საქართველომ ხორვატია 1:0 დაამარცხა
27.03.11 12:09
საქართველოს ფეხბურთელთა ნაკრებმა ხორვატიის ნაკრები ბორის პაიჭაძის სახელობის ეროვნულ სტადიონზე ანგარიშით 1:0 დაამარცხა.
ამ გამარჯვებით, საქართველოს ნაკრებმა ევროპის 2012 წლის გათამაშების შესარჩევ ეტაპზე მნიშვნელოვანი გამარჯვება მოიპოვა. ქართველებმა ჯგუფის ლიდერი და ევროპის გუნდებს შორის ერთ-ერთი გამორჩებული ხორვატიის ნაკრები დაამარცხეს.
ბორის პაიჭაძის სახელობის ეროვნულ სტადიონზე სრული ანშლაგი იყო. 90 წუთის განმავლობაში ქართველი გულშემატკივარი თავის გუნდს აქტიურად ქომაგობდა. მატჩის პირველი ტაიმი ხორვატიის ნაკრების უპირატესობით წარიმართა, თუმცა მეორე ტაიმში ქართველმა ფეხბურთელებმა მოახერხეს შეხვედრაში გარდატეხის შეტანა.
დაახლოებით ბოლო ნახევარი საათის განმავლობაში, მათი სათამაშო უპირატესობა აშკარა გახდა, რასაც შეხვედრის ბოლო წინა, 89-ე წუთზე ლევან კობიაშვილის გოლი მოჰყვა.
გოლის შემდეგ ქართველების კართან ბოლო წუთებში რამდენიმე სახიფათო მომენტი შეიქმნა. ხორვატ ფეხბურთელებს ჰქონდათ შანსი იმისა, რომ ანგარიში გაეთანაბრებინათ, თუმცა საბოლოოდ მათ ეს ვერ მოახერხეს და შეხვედრა ქართველი ფეხბურთელების გამარჯვებით დასრულდა.
საქართველოს ნაკრების თამაში სათანადოდ შეაფასა ხორვატთა მთავარმა მწვრთნელმა სლავენ ბილიჩმა, რომელმაც გარჯვება ქართველ ფეხბურთელებს და თემურ ქეცბაიას გასახდელში პირადად გასახდელში მიულოცა.
მატჩს ესწრებოდა საქართველოს პრეზიდენტი მიხეილ სააკაშვილი.
საფეხბურთო ზეიმმა ბორის პაიჭაძის სახელობის ეროვნული სტადიონის ტრიბუნებიდან თბილისის ქუჩებში გადაინაცვლა. ქუჩებში ხალხი ერთმანეთს გამარჯვებას ულოცავდა.
|
