წლის შემაჯამებელი ბრიფინგი ეკონომიკის სამინისტროში
23.12.11 14:57
მდგრადი განვითარებისა და ეკონომიკის სამინისტროში წლის შემაჯამებელი ბრიფინგი გაიმართა. მინისტრის ვერა ქობალიას განცხადებით, საქართველოსთვის ეს წელი, ეკონომიკური ზრდის თვალსაზრისით, ძალიან წარმატებული იყო.
`ეკონომიკური თვალსაზრისით, 2011 წელი იყო ძალიან წარმატებული საქართველოსთვის, რადგან ჩვენ ვართ ერთ-ერთი პირველი ქვეყანა ყახაზეთის შემდეგ, რომელსაც სარეიტინგო კომპანიებმა რეიტინგი აუმაღლეს. ჩვენ ვართ ერთ-ერთი ქვეყანა მსოფლიოში, რომელსაც აქვს 6,5%-იანი ზრდა მსოფლიოში, რაც პირდაპირ აისახება როგორც დასაქმებაზე, ისე სხვა ეკონომიკური სექტორების განვითარებაზე,`- განაცხადა მინისტრმა.
მინისტრის განცხადებით, 2011 წლის მონაცემებით, საქართველო მთლიანი შიდა პროდუქტის ზრდის მაჩვენებლით მსოფლიოში მესამე ადგილზეა, პირველ და მეორე ადგილებს კი თურქეთი და ესტონეთი ინაწილებენ.
ამასთან, 2012 წლის Doing Business-ის მონაცემების მიხედვით, საქართველოს 183 ქვეყანას შორის ქონების რეგისტრაციის თვალსაზრისით, პირველი პოზიცია უკავია. ამავე რეიტინგში, საქართველო პირველი ათეული ქვეყნების სიაში წარმოდგენილია შემდეგ სფეროებში: მშენებლობის ნებართვა - მე-4, ბიზნესის დაწყება - მე-7 და დაკრედიტება მე-8 ადგილი.
2011 წლის მონაცემებით, კორუფციის შემცირების თვალსაზრისით, რეგიონში საქართველოს მეორე პოზიცია უკავია.
|
