საგურამოში ახალი ლუდსახარში გაიხსნა
02.04.12 19:00
საგურამოში ახალი ლუდსახარში გაიხსნა. ქართული ინვესტიციებით აშენებული ქარხანა უმაღლესი ხარისხის ლუდსა და ლიმონათს აწარმოებს. პროდუქცია გასაყიდად ხვალიდან გამოვა. სამუშაოებზე 32 მილიონი ევრო დაიხარჯა. ახალი საწარმო დღეს საქართველოს პრეზიდენტმა გახსნა.
`ეს სასწაული, რომელსაც მე ვხსნი დღეს, მართლაც ძალიან შთამბეჭდავია, იმიტომ, რომ საქართველოში ასეთი თანამედროვე ქარხანა ჩვენ არ გვაქვს. ეს არის ერთ-ერთი ყველაზე თანამედროვე ხაზი ამ პროდუქციის წარმოებაში ევროპაში. შვიდ თვეში დასრულდა მშენებლობა და ერთ თვეში უკვე არის პროდუქცია. ჩვენი შვიდასი თანამოქალაქე მუშაობს, რაც იმას ნიშნავს, რომ შვიდასი ადამიანის ოჯახის წევრებს გაუჩნდათ პერსპექტივა და უკეთესი ცხოვრების რეალური შესაძლებლობა. ვინც რა უნდა ილაპარაკოს, საქართველოში ეკონომიკა ვითარდება ჩვენი რეგიონისთვის ძალიან ჩქარი ტემპით; შარშან ჩვენი ეკონომიკის ზრდა იყო 7%, წელს ველოდებით უფრო მეტს, მაგრამ, რა თქმა უნდა, საქართველოში ჯერ კიდევ არის გაჭირვება, უმუშევრობა და მე ეს ძალიან კარგად ვიცი. თუმცა მე ვუყურებ ციფრებს და ვიცი, რომ უმუშევრობამ დაიწყო შემცირება,`- განაცხადა პრეზიდენტმა.
|
