სააკაშვილი მედვედევის ბრალდებებს პასუხობს
26.04.12 18:12
დიმიტრი მედვედევის მორიგ ბრალდებებს მიხეილ სააკაშვილი გამოეხმაურა. განცხადება საქართველოს პრეზიდენტმა რუსთავში ახალი ავტოდრომის დათვალიერებისას გააკეთა.
"ის, რომ რუსეთის დღევანდელ მთავრობას ქართველი ხალხი უყვარს, ამ ტყუილის კბილი ჩვენმა ხალხმა უკვე დიდი ხანია, მოიცვალა", - განაცხადა მიხეილ სააკაშვილმა.
პრეზიდენტის თქმით, საქართველოს დღევანდელმა მთავრობამ საქართველო აქცია ისეთი წარმატებული რეფორმების ქვეყნად, რომლის დაწევაც მათ არ შეუძლიათ.
"არადა, წარმატებული საქართველო არის მათთვის ყველაზე დიდი კოშმარი. ქვეყანა, რომელიც მათ გამოაცხადეს განადგურებულად და დამთავრებულად 2008 წელს, აღდგა ფერფლისგან და მიაღწია ისეთ წარმატებებს, რომელიც მისაბაძად იქცა არა მარტო რუსეთის ოპოზიციისთვის, ასევე რუსეთის დღევანდელი მთავრობის ხელმძღვანელებისთვის", - განაცხადა მიხეილ სააკაშვილმა.
პრეზიდენტის თქმით, რუსეთს საქართველოს ხელისუფლების შეცვლა სურს იმიტომ, რომ სათავეში მოვიდეს ისეთი ძალა, რომელიც ირიბად ან პირდაპირ ჰპირდება, რომ დააკანონებს საქართველოს ტერიტორიების ოკუპაციას, "ჰპირდება, რომ ის შეწყვეტს საერთაშორისო მხარდაჭერას ამ თემაზე და შეურიგდება არსებულ "ახლად შექმნილ რეალობებს, როგორც ამას რუსეთის ხელისუფლება უწოდებს", - განაცხადა მიხეილ სააკაშვილმა.
პრეზიდენტის თქმით, თუ რუსეთის ხელისუფლება მზად არის, საქართველოს დაუბრუნოს ოკუპირებულ ტერიტორიებზე კონტროლი და გაიყვანოს ჯარები, მზად არის დღესვე ჩაფრინდეს და მოაწეროს ხელი ხელშეკრულებას.
"მზად ვარ მოვაწერო ხელი ხელშეკრულებას, რომ ვცვლი ჩემი და ჩემი მთავრობის ხელისუფლებიდან წასვლას საქართველოს ტერიტორიების დაბრუნებაზე", - განაცხადა მიხეილ სააკაშვილმა.
"მზად ვარ დამატებით მოვიჭრა და გავუგზავნო მათ ჩემი სხეულის ის ნაწილები, რომლის მიმართაც არაერთხელ გამოხატეს ინტერესი", - დასძინა სააკაშვილმა.
|
