ნატოს კვირეულის პირველი სამუშაო დღე აპატურაიმ გახსნა
11.06.12 19:35
ნატოს კვირეულის პირველი სამუშაო დღე თბილისში ნატოს გენერალური მდივნის სპეციალურმა წარმომადგენელმა გახსნა. ჯეიმს აპატურაი საერთაშორისო კონფერენციაზე ერთ-ერთი მთავარი მომხსენებელი იყო.
ალიანსის წარმომადგენელი პარალელურად შეხვედრებს მართავს საქართველოს ხელისუფლებისა და სამოქალაქო სექტორის წარმომადგენლებთან.
პირველი მოლაპარაკება მას საქართველოს ვიცე-პრემიერ გიორგი ბარამიძესთან ჰქონდა. შეხვდა საგარეო უწყების ხელმძღვანელს გრიგოლ ვაშაძესაც.
"შესანიშნავი შეხვედრა გვქონდა. უპირველეს ყოვლისა, ჩვენ მადლიერების გრძნობა გამოვხატეთ, რადგანაც ჩიკაგოს სამიტი იყო კიდევ წინ გადადგმული ნაბიჯი. მინდა შეგახსენოთ, რომ ჩიკაგოს სამიტზე ჩვენ მივაღწიეთ რამდენიმე ძალიან მნიშვნელოვან შედეგს - უპირველეს ყოვლისა, საქართველო იყო ერთადერთი ქვეყანა, რომელიც ყველა ფორმატში მონაწილეობდა. რაც შეეხება ფინალურ დოკუმენტს, ყველაფერი რაც ჩვენ გვაინტერესებდა და გვჭირდებოდა, ამ დოკუმენტში შევიდა," - განაცხადა ვაშაძემ.
"რა თქმა უნდა, ვეთანხმები საგარეო საქმეთა მინისტრის ანალიზს ჩიკაგოს სამიტთან დაკავშირებით. მინდა ხაზი გავუსვა, რომ საქართველო წარმოდგენილი იყო 13 განსაკუთრებულ პარტნიორს შორის და ეს შეხვედრა იყო არა საქართველოს ნატოსკენ მისწრაფებაზე, არამედ გლობალური და რეგიონული უსაფრთხოების შესახებ, რომელსაც გვსურს ერთად მივაღწიოთ. ეს არის ტრანსფორმაცია. მთელ მსოფლიოში საქართველო ჩანს, როგორც ნატოს პარტნიორი," - განაცხადა აპატურაიმ.
|
