პრეზიდენტი და პრემიერი სოფელ ხრეითს ესტუმრნენ
05.07.12 20:34
მინისტრთა კაბინეტის წევრებთან ერთად, პრეზიდენტი დღეს სოფელ ხრეითში იმყოფებოდა. მიხეილ სააკაშვილი ხრეითში ჭიათურიდან გადავიდა.
პრეზიდენტი ადგილობრივებს შეხვდა და მათი პრობლემებით დაინტერესდა. სოფელი ხრეითი ჭიათურიდან 18 კილომეტრითაა დაშორებული.
დასახლებულ პუნქტში წყლით მომარაგების პრობლემაა. ადგილობრივები სასმელ წყალს ჭიდან იღებენ.
სოფლის სკოლაში მხოლოდ დაწყებითი კლასები ფუნქციონირებს.
მიხეილ სააკაშვილმა და პრემიერ-მინისტრმა ადგილობრივებს პრობლემის მოგვარებაში დახმარება აღუთქვეს.
მოსახლეობასთან შეხვედრამდე, საქართველოს პრეზიდენტმა და მთავრობის წევრებმა სოფელ ხრეითის დაწყებითი სკოლა დაათვალიერეს. სკოლა სრულიად ამორტიზებულია. მოსწავლეებს აქ სწავლის არანაირი პირობები არ აქვთ. საკლასო ოთახების დათვალიერების შემდეგ პრეზიდენტი სკოლასთან შეკრებილ მოსახლეობასაც გაესაუბრა.
|
