პრეზიდენტი და მინისტრები კახეთში იმყოფებიან
19.07.12 14:42
საქართველოს პრეზიდენტი, პრემიერი და მინისტრები სტიქიის შედეგად დაზარალებულ კახეთში იმყოფებოდნენ, სადაც მთავრობის საგანგებო სხდომა გაიმართა. სხდომას მიხეილ სააკაშვილი ხელმძღვანელობდა. მიხეილ სააკაშვილმა მინისტრებს შექმნილი ვითარების დეტალურად შესწავლა, აუცილებელი ძალების მობილიზება და მოსახლეობის დასახმარებლად კონკრეტული ღონისძიებების დაწყება დაავალა.
ვანო მერაბიშვილმა უწყებათა ხელმძღვანელებს რეგიონის სოფლების დათვალიერება და შექმნილი ვითარების ადგილზე გაცნობა დაავალა. თავად პრემიერი კი სოფლების გამგებლებს შეხვდა და კახეთის რვა რაიონში შექმნილი სიტუაციის შესახებ მათგან მიიღო ინფორმაცია. პრემიერ-მინისტრი სოფელ კურდღელაურში ჩავიდა, სადაც უკვე მუშაობს თავდაცვის სამინისტროს სარეზერვო ბატალიონიც.
სტიქიის შედეგად დაზარალებული თელავის ქუჩებში გავიდა საქართველოს პრეზიდენტი. მიხეილ სააკაშვილი ადგილობრივებს ესაუბრა და მთავრობის გეგმები გააცნო, თუ როგორ აპირებს ხელისუფლება უამინდობის შედეგებთან გამკლავებას. პრეზიდენტი დაზარალებული მაისურაძეების ოჯახსაც ესტუმრა და ასევე თელავის ბავშვთა სახლში არსებულ მდგომარეობასაც გაეცნო. აქ ეზო და საწყობები მთლიანად განადგურებულია, თუმცა ბავშვების საძინებლები სტიქიას გადაურჩა.
|
