ოჩიაური ივანიშვილის განცხადებას ეხმაურება
03.09.12 18:35
`ერთიანი ნაციონალური მოძრაობა` ბიძინა ივანიშვილის მიერ პედაგოგების მისამართით გაკეთებულ განცხადებას გამოეხმაურა. ამ თემაზე დღეს ბრიფინგი ხათუნა ოჩიაურმა გამართა.
მმართველ გუნდში აცხადებენ, რომ პედაგოგები საზოგადოების ერთ-ერთ საუკეთესო ნაწილს შეადგენენ და მათზე თავდასხმა და შეურაცხმყოფელი ეპითეტებით საუბარი უსაფუძვლო და მიუღებელია.
`ბიძინა ივანიშვილი ყოვლად უსაფუძვლოდ, უსამართლოდ და უზნეოდ ახორციელებს თავდასხმებს საქართველოს პედაგოგების მიმართ. ის პედაგოგებს ადანაშაულებს არჩევნების გაყალბებაში, შეურაცხყოფას აყენებს მათ და ამბობს, რომ ისინი არიან გაუნათლებელი, უმაღლესი განათლების არმქონე პირები, 300 ლარად იყიდებიან და უფრო მეტიც, ის ემუქრება პედაგოგებს დასჯით და დაპატიმრებით. ჩვენ ვაცხადებთ, რომ პედაგოგები არიან ყველაზე ღირსეული ნაწილი ჩვენი საზოგადოებისა და მათზე ზრუნვა სახელმწიფოს ვალია,`- განაცხადა ოჩიაურმა.
|
