თქვენ ხართ სტუმარი ნომერი:
|
|
შტეფან ფულესა და კეთრინ ეშტონის განცხადება
04.09.12 10:36
ევროკომისარმა შტეფან ფულემ და კომისიის ვიცე-პრეზიდენტმა კეთრინ ეშტონმა საქართველოში საპარლამენტო არჩევნებთან დაკავშირებით ერთობლივი განცხადება გავრცელეს, რომელშიც ნათქვამია, რომ ევროკავშირი ამ არჩევნებს იმედით ელოდება.
განცხადების თანახმად, ეს არჩევნები იქნება უაღრესად მნიშვნელოვანი საქართველოს გრძელვადიანი დემოკრატიული განვითარების კუთხით და ევროკავშირი-საქართველოს მომავალი ურთიერთობების ხარისხსა და ინტენსივობას განსაზღვრავს.
"ჩვენ მივმართავთ თხოვნით, როგორც ხელისუფლებას, ისე ოპოზიციას, უზუნველყონ მშვიდობიანი და კონკურენტუნარიანი საარჩევნო და ჯანსაღი მედიაგარემო. შეშფოთებული ვართ ამ კონტექსტში მზარდი პოლარიზაციითა და დაძაბულობით – არჩევანი პოლიტიკურ პროგრამებსა და იდეებს შორის უნდა გაკეთდეს. ჩვენ ხაზს ვუსვამთ პასუხისმგებლობას, რომელიც ხელისუფლებასა და ოპოზიციას აკისრია, რათა უზრუნველყონ არჩევნების სათანადოდ ჩატარება და შესაბამისად, ლეგიტიმურობა. აუცილებელია დაცული იქნეს საარჩევნო კანონმდებლობა და ისე იყოს გამოყენებული, რომ ხელი შეუწყოს ნდობას საარჩევნო პროცესის სამართლიანობისა და კანონის უზენაესობისადმი. ყველა პარტიამ და კანდიდატმა უნდა უზრუნველყოს მშვიდობიანი და პასუხისმგებლიანი გარემო არჩევნებისთვის, თავი შეიკავოს გამომწვევი ქმედებებისა და განცხადებებისგან, რომლებიც ისედაც დაძაბულ გარემოს გააუარესებს და არჩევნების შედეგებს ეჭვქვეშ დააყენებს. დემოკრატიის შექმნა განსხვავებული პოლიტიკური შეხედულებების მქონე აქტორების პასუხისმგებლობას ეფუძნება", - აღნიშნულია განცხადებაში.
შტეფან ფულე და კეთრინ ეშტონი ევროკავშირის სახელით კიდევ ერთხელ ძლიერ მხარდაჭერას უცხადებენ საქართველოს ტერიტორიულ მთლიანობას და გამოთქვამენ სურვილს, ევროკავშირი დარჩეს ჩართული ჟენევის დისკუსიებისა და მონიტორინგის მისიის მეშვეობით.
ევროკავშირის მაღალი რანგის წარმომადგენლები ასევე აღნიშნავენ, რომ საქართველო ევროკავშირისთვის ძლიერი პარტნიორია და მხარს უჭერენ ამ დინამიკური ურთიერთობების შემდგომ გაღრმავებას.
"ღრმა და ყოვლისმომცველი თავისუფალი ვაჭრობისა და სავიზო რეჟიმის გამარტივებასთან დაკავშირებულ მოლაპარაკებებში მნიშვნელოვანი პროგრესი შეინიშნება. ვადასტურებთ ჩვენს ვალდებულებას, შევინარჩუნოთ ტემპი თანამშრომლობასთან დაკავშირებული მოლაპარაკებების მომავალ წელს დასრულების მიზნით. ასევე ჩვენი მიზანია - ვიზების ლიბერალიზაციის გეგმის განხილვა წლის ბოლომდე დავიწყოთ. საქართველო ახლა რამდენიმე გამოწვევის წინაშე დგას - დემოკრატიის კონსოლიდაცია, ზრდის სარგებლის გავრცელება და მარგინალური ჯგუფების ფართო ინტეგრაცია, რაც არის ქართული საზოგადოების მდგრადი განვითარების გასაღები", - ნათქვამია შტეფან ფულესა და კეთრინ ეშტონის ერთობლივ განცხადებაში.
|
   |
|
|
|
|
|
|
|
