ეუთოს სადამკვირვებლო მისიის შუალედური ანგარიში
11.09.12 15:40
ეუთოს სადამკვირვებლო მისია შუალედურ ანგარიშს აქვეყნებს. დასკვნაში ნათქვამია, რომ ამ არჩევნებში ერთიან ნაციონალურ მოძრაობას სხვა პოლიტიკურ გაერთიანებებთან ერთად უპირისპირდება `ბიძინა ივანიშვილი - ქართული ოცნება`- ექვსი ოპოზიციური პარტიისგან შემდგარი კოალიცია, რომლებსაც მეტად განსხვავებული პოლიტიკური ხედვები აქვთ. დასკვნის მიხედვით, წინასაარჩევნო გარემო პოლარიზებულია. იმ დროს, როდესაც ერთიანი ნაციონალური მოძრაობა აცხადებს მზაობას - ჩაატაროს არჩევნები შესაბამისი სტანდარტების სრული დაცვით, ქართულმა ოცნებამ გამოხატა უნდობლობა საარჩევნო პროცესის მიმართ. არჩევნებში მონაწილე ყველა სუბიექტი ე.წ. კარდაკარს და ამომრჩეველებთან შეხვედრებს ატარებს და ასევე იყენებს სატელევიზიო პოლიტიკურ რეკლამებს.
ხანდახან კონკრეტული პოლიტიკური პლატფორმის წარმოჩენის მაგივრად, წინასაარჩევნო კამპანია, ერთი მხრივ, თანამდებობის და მეორე მხრივ, კერძო ფინანსური რესურსების გამოყენებაზე ფოკუსირდება. ზოგიერთი პოლიტიკური გაერთიანებების შესახებ კანონს და სახელმწიფო აუდიტის სამსახურის მიერ მის აქტიურად განხორციელებას ქართული ოცნების პოლიტიკური საქმიანობის შეზღუდვის მცდელობად აფასებს. ხოლო ზოგი აღნიშნავს, რომ ამ ქმედებების მიზანია `დიდი ფულის` მიერ პოლიტიკურ არჩევანზე ზეგავლენის მოხდენის აღკვეთა, - ნათქვამია ეუთოს სადამკვირვებლო მისიის შუალედურ ანგარიშში.
|
