ესტონეთის საგარეო საქმეთა მინისტრი თბილისში იმყოფება
12.09.12 13:50
საქართველოში ესტონეთის საგარეო საქმეთა მინისტრი იმყოფება. ურმას პაეტი თბილისში დღეს დილით ჩამოფრინდა.
მან უკვე გამართა შეხვედრა თავის ქართველ კოლეგასთან. გრიგოლ ვაშაძესთან პირისპირ საუბრის შემდეგ კი მოლაპარაკებები გაფართოებულ ფორმატში გაგრძელდა.
მხარეებმა ხელი მოაწერეს შეთანხმებას საქართველოსა და ევროკავშირს შორის უნებართვოდ მცხოვრებ პირთა რეადმისიის შესახებ. ასევე გაიმართა ურმას პაეტის და გრიგოლ ვაშაძის ერთობლივი პრესკონფერენცია.
ესტონეთის საგარეო საქმეთა მინისტრმა დაადასტურა, რომ 2013 წლის ვილნიუსის სამიტისთვის ევროკავშირსა და საქართველოს შორის დასრულებული იქნება ასოცირების, უვიზო მიმოსვლასა და თავისუფალი ვაჭრობის შესახებ ხელშეკრულებებზე მოლაპარაკება.
დიპლომატმა საქართველოში მოახლოებულ არჩევნებზეც ისაუბრა. ურმას პაეტის თქმით, სამართლიანი და გამჭვირვალე არჩევნების ჩატარება მორიგი ტესტია საქართველოსთვის და მოუწოდა ყველა პოლიტიკურ ძალას - აღიარონ შედეგები.
|
