ამერიკის ატლანტიკური საბჭოს კვლევა
18.09.12 16:45
ამერიკის შეერთებული შტატების ატლანტიკურმა საბჭომ საქართველოში წინასაარჩევნო ვითარებასთან დაკავშირებით კვლევა მოამზადა სათაურით - `საქართველოს პოლარიზებული პოლიტიკური ლანდშაფტი არჩევნების წინ`.
დოკუმენტში დეტალურადაა საუბარი არჩევნებში მონაწილე პარტიების შესახებ. თუმცა ავტორები ხაზს უსვამენ, რომ პირველი ოქტომბრის საპარლამენტო არჩევნებში მთავარი ბრძოლა ერთიან ნაციონალურ მოძრაობასა და კოალიცია "ქართულ ოცნებას" შორის გაიმართება.
ავტორთა შეფასებით, ამ არჩევნების შედეგები არსებით გავლენას მოახდენს საქართველოს ძალისხმევაზე დასავლეთის ინსტიტუტებში გასაწევრიანებლად.
დოკუმენტში ასევე წერია, რომ ქართული ოცნების გამარჯვება აშშ-საქართველოს ურთიერთობებს ძირეულ გადახედვამდე მიიყვანს.
`ივანიშვილი რჩება ამოუცნობ ფიგურად. ნაკლებადაა ცნობილი მისი პოლიტიკური მიდრეკილებების შესახებაც. გაყოფილი მთავრობა, პრემიერ-მინისტრ ივანიშვილთან და პრეზიდენტ სააკაშვილთან ერთად ქართულ პოლიტიკაში დიდ არასტაბილურობას გამოიწვევს, რომლის შედეგიც ნამდვილად არ იქნება სახარბიელო,`- ნათქვამია ატლანტიკური საბჭოს კვლევაში.
ავტორებს ასევე მოჰყავთ ენდიაისა და აი-არ-აის ბოლოდროინდელი სოციოლოგიური გამოკითხვების შედეგები და ხაზს უსვამენ, რომ ამ კვლევებში მოსახლეობის 12-დან 24 პროცენტამდე მხარს უჭერს კოალიცია ქართულ ოცნებას. ამავე სოციოლოგიური გამოკითხვების თანახმად, ერთიანი ნაციონალური მოძრაობა მნიშვნელოვან გამარჯვებას მიაღწევს. დოკუმენტში წერია, რომ მმართველი პარტიის მიღწევები შთამბეჭდავია, მან მნიშვნელოვნად შეამცირა კორუფცია რეფორმების ხარჯზე და მაღალ დონეზე აიყვანა ქვეყნის ინფრასტრუქტურა. ატლანტიკური საბჭოს ექსპერტები ასევე ხაზს უსვამენ, რომ ქვეყანაში ბევრადაა გაუმჯობესებული ბიზნესგარემო და საქართველო უკვე აწარმოებს მოლაპარაკებებს ევროკავშირთან ღრმა და თავისუფალ სავაჭრო შეთანხმებაზე. გარდა ამისა, მხარდაჭერა გამოუცხადა ამერიკა-საქართველოს შორის თავისუფალი ვაჭრობის ხელშეკრულებას თავად ბარაკ ობამამაც.
|
