სააკაშვილმა სამხედრო მოსამსახურეებს ბინები გადასცა
20.09.12 20:31
პრეზიდენტი და თავდაცვის მინისტრი დღეს სამხედრო ქალაქში იმყოფებოდნენ. მიხეილ სააკაშვილმა და დიმიტრი შაშკინმა სამხედრო მოსამსახურეებს ბინები გადასცეს.
სამხედრო ქალაქში ბინის პირველი გასაღები პრეზიდენტმა ლოპოტის ხეობაში დაღუპული ექიმის ვლადიმერ ხვედელიძის ოჯახის წევრს გადასცა. ბინები გადაეცათ ასევე სერჟანტ კახაბერ მანგოშვილს და კაპრალ ბესიკ ბურდულს, ვიცე-პოლკოვნიკ ზურაბ გელაძეს და მაიორ ბექა ამბროლაძეს.
შეხვედრის შემდეგ საქართველოს პირველმა პირმა პატიმრებისადმი არაადამიანური მოპყრობის ფაქტებსა და სისტემურ ცვლილებებზეც გაამახვილა ყურადღება.
ვიზიარებ ყველა იმ ადამიანის აღშფოთებას და ვუერთდები, ვინც არის შეძრწუნებული და გააფთრებული იმის გამო, რაც ტელევიზიით იხილა, -განაცხადა მიხეილ სააკაშვილმა და დასძინა, რომ ამ ყველაფრის წარმოდგენაც კი არ შეეძლო.
"რაც გლდანის საპყრობილეში ხდებოდა, იმ ჯგუფის მოქმედება, რომელიც ყველამ დავინახეთ, ეს არის ყველაფერი ის, რაც მეზიზღება და ყველაფერი ის, რისი წარმოდგენაც კი არ შემეძლო, რომ ახალ საქართველოში კიდევ შესაძლებელია და ამის ცალკეული უჯრედები კიდევ არსებობდა ჩვენს ორგანიზმში. ეს არის ის, რაც მეგონა უკვე ერთხელ და სამუდამოდ ფეხამოკვეთილი და დამარცხებული მთელ საქართველოში", - განაცხადა პრეზიდენტმა.
მისივე თქმით, ის, რაც საზოგადოებამ იხილა, იყო ჩვენი ყოველდღიური რეალობა 8 წლის წინ.
"მე კარგად მახსოვს, როგორ ცვიოდა შსს-ს ფანჯრიდან ხალხი. მე ძალიან კარგად მახსოვს, ცემით რომ მოკლეს მძღოლი მხოლოდ იმის გამო, რომ პრეზიდენტის ესკორტი არ გაატარა თავისუფლების მოედანზე და რიყეზე. ყველას თვალწინ ხდებოდა ეს ყველაფერი. მახსოვს გატაცებები. ციხეში ცემაზე აღარც ვლაპარაკობ. ერთადერთ ადგილს, სადაც დენი მუდმივად მიეწოდებოდა, იყო დენზე შეერთებული ადამიანები პოლიციაში. რა თქმა უნდა, ის, რაც მოხდა ეს ყველანაირი ადამიანური პრინციპების იქით მიდის და არ შეიძლება არ იყოს საზოგადოების აღშფოთების და წარმოუდგენელი გაღიზიანების საგანი; პირადად მე ასეთი გაბრაზებული და აღშფოთებული ძალიან იშვიათად ვყოფილვარ ჩემს ცხოვრებაში, ალბათ არც ვყოფილვარ", - განაცხადა სააკაშვილმა.
პრეზიდენტის თქმით, არ შეიძლება ყველაფერი არჩევნებზე გაიცვალოს.
"ეს კონკრეტული ადამიანი, ვინც ყველაზე მეტად ამას ჩადიოდა ახლა ლამის გმირად შერაცხეს. თვეების განმავლობაში იღებდა ხელფასს, ფულს იღებდა, რომ ეს გაეკეთებინა და შემდეგ გაეყიდა. მე მინდა მივმართო იმ ადამიანებს, ვინც ამას აფინანსებდა. ხომ არ შეიძლება ყველაფერი გაიცვალოს არჩევნებზე. თუ შენ იცი, რომ ეს ხდება თვეების განმავლობაში, ამაში იხდი ფულს, თან ორგანიზებული დანაშაულის ელემენტების ჩართვით, რანაირად შეიძლება წყნარად გეძინოს და პირიქით, ხელებს იქავებდე, რომ აი, არჩევნების წინ ეს იყოს კარგი დამადასტურებელი საბუთი", - აღნიშნა პრეზიდენტმა.
მისივე თქმით, მომხდარზე სახელმწიფო პასუხისმგებლობას არ იხსნის, რადგან ეს მათ დაუშვეს.
"ჩვენ დავუშვით, რომ ყოფილი "გაიშნიკი" მუშაობდა სისტემაში, როგორც ბევრი სხვა ტიპაჟი. ძნელია ამათ ადამიანები უწოდო, რომელსაც ჰქონდა ორგანიზებულ დანაშაულთან შეკვრის ისტორია. დავუშვით, რომ ასე დაუსჯელად ემოქმედა, გაეკეთებინა, გაეყიდა ეს ინფორმაცია და შემდეგ საერთოდ გაქცეულიყო. ერთი მთავარი გაიქცა. ეს არის ხელისუფლების ძალიან დიდი მინუსი, მაგრამ არ არის საბაბი იმისათვის, რომ საქართველო ერთხელ და სამუდამოდ დააბრუნონ იქ, საიდანაც ჩვენი ქვეყნა გამოვიყვანეთ, თუმცა კუდები, როგორც ჩანს, ჩაგვრჩენია უკან", - განაცხადა სააკაშვილმა.
მისივე თქმით, მისი იუსტიციის მინისტრობისას პატიმრებს ოჯახის წევრები კვებავდნენ, ახლა ეს და კიდევ ბევრი სხვა პრობლემა მოიხსნა.
ამასთან, პრეზიდენტმა აღნიშნა, რომ მან ახალი მინისტრი დანიშნა და ამ სფეროში ყველაფერს შეცვლის.
"იმ მიღწევებს, რაც არის, შევინარჩუნებთ, მიღწევები და განვითარებები მართლაც იყო. მაგრამ იმან, რაც მოხდა, პრაქტიკულად ყველაფერს გადაუსვა ხაზი ჩემს თვალშიც და საზოგადოების თვალშიც. ყველას მივმართავ, არ გამოიყენოთ ადამიანების ბედი, ვინც არ უნდა იყვნენ ეს ადამიანები სხვადასხვა პოლიტიკური თამაშისთვის", - განაცხადა მან.
|
