სპეციალური კომისია პატიმართა წამების ფაქტებს გამოიძიებს
25.09.12 13:26
საპატიმროებში პატიმრებთან არაადამიანური მოპყრობისა და ძალადობის ფაქტების გამოძიების მიზნით, შეიქმნება სპეციალური საგამოძიებო კომისია. ამის შესახებ სასჯელაღსრულების მინისტრმა გიორგი ტუღუშმა განაცხადა.
მისი თქმით, კომისიის წევრებიც იქნებიან სასჯელაღსრულების მინისტრის წარმომადგენელი, პარლამენტის ადამიანის უფლებათა კომიტეტის წევრი, შესაბამისი პროფილის არასამთავრობო ორგანიზაციის წარმომადგენელი, ერთი პროკურორი, რომელსაც წამებისა და არაადამიანური მოპყრობის საქმეებზე გამოძიება არ უწარმოებია. ჯგუფში ასევე მიწვეული იქნებიან კონსულტანტები, ცნობილი საერთაშორისო ექსპერტები, დამკვირვებლები და უფლებადამცველები. კომისია ათი დღის ვადაში შეიქმნება და მისი მუშაობა სახელმწიფო ბიუჯეტიდან დაფინანსდება.
მინისტრმა ასევე განაცხადა, რომ გარდა იმ საზარელი ფაქტებისა, რომელიც გავრცელებულ ფირებზე იყო აღბეჭდილი, ირკვევა, რომ სისტემაში ასევე ხშირის იყო წამების, სასტიკი და ღირსების შემლახავი მოპყრობის სხვა მეთოდების გამოყენებაც. გამოძიებას უკვე აქვს ამ ფაქტების დამადასტურებელი მტკიცებულებები.
მინისტრმა ასევე მიმართა მედიას თავი შეიკავონ უკვე გავრცელებული ან დამატებით ახალი ვიდეომასალის ჩვენებისგან, სანაცვლოდ კი ეს მასალა პროკურატურას მიაწოდონ.
|
