`ქართულმა ოცნებამ` დასკვნითი აქცია გამართა
29.09.12 20:57
"ქართული ოცნების" აქცია თავისუფლების მოედნაზე, მუსიკალური შესავლით დაიწყო. სცენა კოალიციის ლიდერის გამოსვლამდე, "ქართული ოცნებისადმი" მიძღვნილი ჰიმნის ავტორმა ჯემალ სეფიაშვილმა და სიმღერის შემსრულებლებმა დაიკავეს.
"ქართულ ოცნებას" სიმღერა სახელწოდებით, " ჩვენ დავბრუნდებით" - არაერთი პოლიტიკური ჰიმნის ავტორმა, ჯემალ სეფიაშვილმა, დაუწერა. კომპოზიტორმა, რომელიც ედუარდ შევარდნაძის მოქალაქეთა კავშირის საარჩევნო კლიპის - "გიხაროდენ" და სხვა ანალოგიური შინაარსის სიმღერების ავტორიცაა, ამჯერად მუსიკალური ნაწარმოები ბიძინა ივანიშვილს და მის კოალიციას მიუძღვნა. კლიპი რამდენიმე კვირის წინ ინტერნეტით გავრცელდა, თუმცა საჯარო პრემიერა სწორედ დღეს "ქართული ოცნების" აქციაზე შედგა.
პოლიტიკური კლიპი ერთადერთმა პოლიტიკურმა გამოსვლამ ჩაანაცვლა. სცენაზე ბიძინა ივანიშვილი, თბილისის მაჟორიტარებთან ერთად, ავიდა, თუმცა თავისუფლების მოედანზე შეკრებილ მხარდამჭერებს მხოლოდ კოალიციის ლიდერმა მიმართა.
დაახლოებით 40-წუთიან გამოსვლაში, ბიძინა ივანიშვილმა მხარდამჭერებს კოალიციის გეგმები კიდევ ერთხელ გააცნო. მიმართვა მცირე ხნით ტექნიკური ხარვეზის გამო შეწყდა, როცა ბიძინა ივანიშვილს სუფლიორი გაეთიშა.
ტექნიკური პრობლემა მალე გამოსწორდა და ბიძინა ივანიშვილმა ბოლო საარჩევნო გამოსვლა გეგმის მიხედვით განაგრძო.
ოჯახის წევრებთან ერთად, ბიძინა ივანიშვილს არ დავიწყებია კიდევ ერთი ადამიანი, რომელსაც კოალიციის ლიდერმა მადლობა გადაუხადა. მისი ვინაობა ივანიშვილს არ დაუკონკრეტებია, თუმცა დააკონკრეტა საქმე, რისთვისაც უცნობმა ადრსატმა ქართული ოცნების ლიდერის განსაკუთრებული მადლობა დაიმსახურა.
"ქართული ოცნების" აქციამ დაპირებული სიურპრიზების გარეშე ჩაიარა, შეკრაბზე არც დაანონსებული სკანდალური კადრები უჩვენებიათ, არც მოულოდნელი გმირი გამოჩენილა, რომლის შესახებც ქალაქში მთელი კვირის განმავლობაში ხმები ვრცელდებოდა და არც დაანოსებული მილიონიანი მარში შედგა, თუმცა მხარდამჭრები ლიდერებთან ერთად თავისუფლების მოედანზე თბილისის სხვადასხვა უბნიდან მასშტაბური მსველელობებით მივიდნენ.
აქცია თავისუფლების მოედნზე, ტრადიციულად, ბერა ივანიშვილის კონცერტით დასრულდა. "ქართული ოცნების" საარჩევნო კამპანიის ფინალურ შეკრებაზე ბიძინა ივანიშვილი მხარდაჭერებს 1 ოქტომბრამდე დაემშვიდობა.
პარალელურად, ”ქართული ოცნების” აქცია ქუთაისშიც მიმდინარეობდა. ამომრჩევლებსა და მხარდამჭერებს ”ქართული ოცნების” სხვა ლიდერებმა მიმართეს. პირველი ტრიბუნაზე გუბაზ სანიკიძე ავიდა. შემდეგ კი კახი კალაძე, ირაკლი ალასანია და რამდენიმე მაჟორიტარი დეპუტატობის კანდიდატი დასავლეთ საქართველოდან. შეხვედრის მონაწილეებს საშუალება ჰქონდათ მონიტორებზე თვალყური ედევნებინათ თბილისის მანიფესტაციისათვის.
აქციის მსვლელობისას ქუთაისში ინციდენტიც მოხდა. კოალიცია ”ქართული ოცნების” ერთ-ერთ ლიდერს, ქუთაისის მაჟორიტარობის კანდიდატს გუბაზ სანიკიძეს აქციაზე სიტყვით გამოსვლის წინ რამდენიმე მოქალაქემ ფურცლებზე დაბეჭდილი დოლარები შეაყარა. გუბაზ სანიკიძეს მომხდარზე რეაგირება და შეფასება არ გაუკეთებია. მან სიტყვით გამოსვლა განაგრძო.
|
