ბიძინა ივანიშვილის განცხადება ჟენევის მოლაპარაკებებთან დაკავშირებით
08.10.12 17:03
ბიძინა ივანიშვილის პრესსამსახურმა ჟენევის ფორმატში მიმდინარე სამშვიდობო მოლაპარაკებების გაგრძელებასთან დაკავშირებით სპეციალური განცხადება გაავრცელა:
`როგორც ცნობილია, კონფლიქტებთან დაკავშირებულ საკითხებზე ჟენევის მორიგი შეხვედრა მიმდინარე წლის 11-12 ოქტომბერს გაიმართება.
გვინდა განვაცხადოთ, რომ კოალიცია „ქართული ოცნება“ სრულად უჭერს მხარს ევროკავშირის, გაერთიანებული ერების ორგანიზაციის და ევროპაში უსაფრთხოებისა და თანამშრომლობის ორგანიზაციის თანათავმჯდომარეობით მიმდინარე სამშვიდობო პროცესს.
საქართველოს ახალი მთავრობის ჩამოყალიბებისთანავე ჩვენ აქტიურ მონაწილეობას მივიღებთ ამ შეხვედრებში და კონსტრუქციულად ვითანამშრომლებთ ჟენევის ფორმატის ყველა მონაწილესთან, საქართველოს ინტერესების გათვალისწინებით ტერიტორიული მთლიანობისა და სუვერენიტეტის საკითხებზე.
გარდამავალ ეტაპზე ჩვენ მზად ვართ კონსტრუქციულად ვითანამშრომლოთ ჟენევის შეხვედრებში მონაწილე საქართველოს დელეგაციასთან, რათა ახალი მთავრობის მიერ დანიშნული წარმომადგენლებისათვის მოვალეობათა გადმოცემა მოხდეს დემოკრატიული სტანდარტების შესაბამისად, წინასწარი კონსულტაციების აუცილებლობის გათვალისწინებით.
ამასთან, გვინდა აღვნიშნოთ ევროკავშირის სადამკვირვებლო (მონიტორინგის) მისიის პოზიტიური როლი უსაფრთხოებისა და სტაბილურობის შენარჩუნების საქმეში და სრულ მზადყოფნას ვაცხადებთ მასთან მჭიდრო თანამშრომლობისათვის,`- ნათქვამია განცხადებაში.
|
