ივანიშვილისა და სააკაშვილის შეხვედრა დასრულდა
09.10.12 12:59
პრეზიდენტის სასახლეში მიხეილ სააკაშვილისა და ბიძინა ივანიშვილის შეხვედრა დასრულდა. შეხვედრის დასრულებისთანავე პრეზიდენტმაც და პრემიერობის კანდიდატმაც მედიისთვის განცხადებები გააკეთეს.
`ჩვენი დღევანდელი შეხვედრა გახლდათ გაგრძელება იმ ჯანსაღი პოლიტიკისა, რომელიც მე და ჩემმა გუნდმა შემოვიტანეთ საქართველოს პოლიტიკურ სივრცეში. ის, რომ მე და ჩემმა გუნდმა მოვახერხეთ და შევქმენით პრეცედენტი საქართველოში პირველად დემოკრატიული გზით ხელისუფლების შეცვლისა, ეს საქართველოს ისტორიაში აუცილებლად ღირსეულად მოიხსენიება. ის, რომ ჩვენ მოვახერხეთ ერთი წლის განმავლობაში ყველა უღირს ქცევას ჩვენი ოპონენტების მხრიდან ღირსეულად ვპასუხობდით, სწორედ ეს გახლავთ დღევანდელი შეხვედრის მიზეზი და მისი გაგრძელება. ჩვენ კიდევ ვაცხადებთ, რომ ჩვენს ოპონენტებს მოვექცევით არა ისე როგორც იმსახურებენ, არამედ ისე, როგორც იმსახურებს ჩვენი ქვეყანა, ჩვენი მოსახლეობა, ჩვენი კულტურა, ეს გახლავთ ჩვენი შეხვედრის მიზეზიც. საუბარი გვქონდა საგარეო პოლიტიკაზე, გვქონდა შეხედულებებზე და ასე შემდგომ, თანხვედრაში მოდის ის საგარეო პოლიტიკა, რაც ჩვენ ორივე მხარეს გაცხადებული გვქონდა, რომ ევროპა და ევროატლანტიკური სივრცე აუცილებლად ჩვენი სტრატეგიაა, ჩვენი სწრაფვა იქნება განუხრელად ევროპისკენ და აუცილებლად საქართველო მოახერხებს უახლოეს დროში გახდეს ნატოს წევრი ქვეყანა. კარგია, რომ ჩვენ მოვახერხეთ შეხვედრა, მოახერხა თვითონ სააკაშვილმა ის განცხადება, რაც მე შევუქე, რომელიც მან გაკეთა არჩევნების შემდგომ, ჩვენი დღევანდელი შეხვედრაც ემსახურება იმას, რომ ჩვენ ვაჩვენოთ, რომ ვართ კულტურული ერი, ჩვენ ვიწყებთ ახალ ცხოვრებას და ჩვენს ოპონენტებს ყოველთვის ღირსეულად მოვექცევით,`- განაცხადა ივანიშვილმა.
`მინდა გითხრათ, რომ დღეს არის ისტორიული პროცესი პირველად ამ რეგიონში, პოსტსაბჭოთა სივრცის ამ რეგიონში ხდება აღმასრულებელი ხელისუფლების უმეტესი ფუნქციების მშვიდობიანად დემოკრატიულად გადაცემა. ქართველმა ხალხმა გააკეთა თავისი არჩევანი. ჩვენ ყოველთვის ვამბობდით და ვიტყვით, რომ ქართველი ერის არჩევანს ჩვენ ვცემთ პატივს, ქართველი ხალხი არის უზენაესი მოქმედი პირი ქვეყანში, რომელიც განსაზღვრავს პოლიტიკურ პროცესებს. ჩვენ ვისაუბრეთ და რა თქმა უნდა, არავისთვის არ არის მოულოდნელი, რომ ჩვენ შორის რჩება ფუნდამენტური განსხვავებები ძალიან ბევრ პოლიტიკურ საკითხზე, ძალიან ბევრ ეროვნულ საკითხზე, მაგრამ ჩვენ, როგორც პასუხისმგებლობის მქონე ხელისუფლება, მე, როგორც პრეზიდენტი, რომელიც არის კონსტიტუციის გარანტი, უზრუნველვყოფ, რომ გადასვლა მთავრობის ფუნქციებს შორის მოხდეს ყოველგვარი ექსცესების გარეშე. მოხდეს ის, როგორც არასდროს არ მომხდარა საქართველოს ისტორიაში, ქართველი ხალხის ინტერესების სრული გათვალისწინებით, მოხდეს პოლიტიკური პროცესების დემოკრატიული ჩარჩოების სრული ინტერესებიდან გამომდინარე. ჩვენ უნდა შევინარჩუნოთ დემოკრატია, მოვაღწიოთ იმას, რომ თავისუფალი არჩევნები საქართველოში მომავალშიც გაგრძელდეს, რომ დემოკრატია საქართველოში პირიქით, გაძლიერდეს და საშუალება იქნეს ყოველთვის მისი განვითარების და ქართველ ხალხს შექმნას უკეთესი პერსპექტივები. მე, როგორც პრეზიდენტი, ვიზრუნებ იმაზე, რომ ქართველი ხალხის ინტერესები იქნეს დაცული და ეს იქნება ჩემი და ჩემი გუნდის მოღვაწეობის მიზანი,` - განაცხადა პრეზიდენტმა.
|
