პროკურატურა იუსტიციის სამინისტროს გამოეყოფა
16.10.12 13:55
პროკურატურა, სავარაუდოდ, იუსტიციის სამინისტროს გამოეყოფა და ცალკე სტრუქტურის სახით განაგრძობს ფუნქციონირებას. ამ სტრუქტურულ ცვლილებებზე აქტიურად საუბრობენ კოალიცია "ქართულ ოცნებაში". იუსტიციის მინისტრობის კანდიდატი თეა წულუკიანი ამ მიზნით საკონსტიტუციო ცვლილებების აუცილებლობაზე ამახვილებს ყურადღებას. მთავარი პროკურორობის კანდიდატი არჩილ კბილაშვილი კი აცხადებს, რომ დაუშვებელია იუსტიციის მინისტრს მთავარ პროკურორზე მეტი უფლებამოსილება ჰქონდეს.
`არსებული მოცემულობით, პროკურატურა შედის იუსტიციის სამინისტროს სისტემაში და ამავდროულად, იუსტიციის მინისტრი არის უფართოესი საპროკურორო უფლებამოსილების მქონე პირი. ეს დაუშვებელია, რადგან კანონით პროკურატურა დაუშვებელია იყოს პოლიტიზებული. ამ შეუსაბამობის აღმოფხვრის მიზნით, მიზანშეწონილია, რომ პროკურატურა გადავიდეს სასამართლო ხელისუფლების სისტემაში ისე, როგორც ადრე იყო,`- განმარტა კბილაშვილმა.
ასევე აპირებენ ბოლო პერიოდის გახმაურებული საქმეების გადახედვასაც. ამ დროისთვის ივანიშვილის მთავრობის მომავალ მთავარ პროკურორს ყველაზე მნიშვნელოვან საქმეებად სანდრო გირგვლიანისა და ბუტა რობაქიძის მკვლელობები, ასევე ყოფილი პრემიერ-მინისტრის - ზურაბ ჟვანიას გარდაცვალება მიაჩნია.
|
