მიხეილ სააკაშვილმა ბარაკ ობამას წერილი მიიღო
16.10.12 15:20
მიხეილ სააკაშვილმა შეერთებული შტატების პრეზიდენტის ბარაკ ობამას წერილი მიიღო. ამ გზავნილში კიდევ ერთხელ არის ხაზგასმით აღნიშნული საქართველოში გამართული საპარლამენტო არჩევნების მნიშვნელობა ქვეყნის დემოკრატიული განვითარების თვალსაზრისით.
`ვარდების რევოლუციის მემკვიდრეობის დასაცავად და თქვენი ქვეყნის მომავლის ევროპასთან დასაკავშირებლად შეუძლებელია გაკეთებულიყო იმაზე მეტი, ვიდრე ისეთი თავისუფალი და სამართლიანი არჩევნების გამართვა, როგორიც დაადასტურებდა საქართველოს, როგორც დემოკრატიული სახელმწიფოს წარმატებას... ახლა, როდესაც არჩევნებმა უკვე ჩაიარა, მსოფლიო ხედავს, რომ საქართველომ ეს ეტაპი თქვენი ლიდერობით გადალახა. წინსვლისთვის საქართველოს დასჭირდება, რომ თქვენ განაგრძოთ ქვეყნის მართვა და პარლამენტთან და ქართული ოცნების კოალიციის ლიდერებთან ერთად იმუშაოთ, რომ მთავრობის გადაბარებისა და ახალი მთავრობის ჩამოყალიბების პროცესი უმტკივნეულოდ წარიმართოს. თქვენმა საჯარო განცხადებებმა არჩევნების შედეგების ცნობასთან დაკავშირებით დაამტკიცა, რომ თქვენთვის უპირველესი ყველა ქართველის ინტერესის გათვალისწინებაა”, - აღნიშნულია პრეზიდენტ ობამას წერილში.
ბარაკ ობამას წერილი მიხეილ სააკაშვილს აშშ-ის სახელმწიფო მდივნის მოადგილემ ერიკ რუბინმა გადასცა. პრეზიდენტის და ამერიკელი დიპლომატის შეხვედრისას საუბრის მთავარი თემა საქართველო-ამერიკის ურთიერთობა, სტრატეგიული თანამშრომლობა და ქვეყანაში გამართული საპარლამენტო არჩევნები იყო. ერიკ რუბინის შეფასებით, საქართველომ კიდევ ერთხელ დაამტკიცა, რომ აღებული აქვს დემოკრატიული კურსი, რომლის განსამტკიცებლად უმნიშვნელოვანესია, როგორც საარჩევნო, ისე ამჟამად მიმდინარე პროცესები.
|
