გადაბარების პროცესი სამინისტროებში გრძელდება
17.10.12 19:10
გადაბარების პროცესი სამინისტროებში გრძელდება. ეკონომიკის მინისტრობის კანდიდატი გიორგი კვირიკაშვილი მინისტრის მოვალეობის შემსრულებელ ვერა ქობალიას შეხვდა.
კვირიკაშვილი სამინისტროში მისი პირველი მოადგილეობის კანდიდატ დიმიტრი ქუმსიშვილთან ერთად მივიდა. გიორგი კვირიკაშვილის თქმით,
მომავალი კვირიდან სამუშაო ჯგუფი დაიწყებს ინტენსიურ მუშაობას, გაკეთდება სამუშაო პროექტების ნუსხა.
მისივე თქმით, მინისტრად დანიშვნის შემდეგ მთავარი ბაზარზე კომპანიებს შორის კონკურენციის საკითხი იქნება.
დილიდან ფინანსთა მინისტრობის კანდიდატი სხვადასხვა დეპარტამენტის ხელმძღვანელებთან 2013 წლის ბიუჯეტის პროექტს და ქვეყნის მაკროეკონომიკურ მაჩვენებლებს განიხილავდა.
ნოდარ ხადურის განცხადებით, მოსახლეობა ზამთარში შეღავათიანი კომუნალური ტარიფებით ისარგებლებს. 2013 წლის ბიუჯეტი კი "ქართული ოცნების" საარჩევნო პროგრამის მიხედვით შეიცვლება.
შეხვედრა გაიმართა ჯანდაცვის სამინისტროშიც. დავით სერგიენკო უწყებაში ამირან გამყრელიძესთან ერთად მივიდა. მინისტრობის ახალმა კანდიდატმა თანამშრომლებთან გაცნობითი ხასითის შეხვედრა გამართა. კონკრეტული პროექტების განხილვა კი ჯანდაცვის სამინისტროში მომდევნო დღეებში იგეგმება.
თანამშრომლებს გაეცნო დღეს რეგიონული განვითარებისა და ინფრასტრუქტურის მინისტრი. ბიძინა ივანიშვილის განცხადებით, საბოლოოდ, ინფრასტრუქტურის სამინისტრო უნდა გაუქმდეს და ნარმანია ფინანსთა მინისტრის მოადგილე გახდება. თუმცა ეს უწყება დეპარტამენტის სახით მაინც გააგრძელებს საქმიანობას.
მინისტრობის კანდიდატის განცხადებით, ყველა ინფრასტრუქტურული პროექტი, რომელსაც უწყება უძღვებოდა, გაგრძელდება. ხვალ კი ის სხვადასხვა სამსახურის, მათ შორის წყალმომარაგების გაერთიანებული კომპანიისა და საავტომობილო გზების დეპარტამენტის ხელმძღვანელებს შეხვდება.
|
