სპორტულ გუნდებს ბიუჯეტიდან დაფინანსება შეუწყდებათ
19.10.12 19:50
ძალოვანი უწყებების დაქვემდებარებაში შემავალ სპორტულ გუნდებს დაფინანსება შეუწყდებათ. განცხადება პარლამენტის თავდაცვისა და უშიშროების კომიტეტის თავმჯდომარეობის კანდიდატმა გააკეთა. მისი თქმით, ბიუჯეტიდან არც ერთი გუნდი არ უნდა დაფინანსდეს.
ამ თემას გამოეხმაურა სპორტის მინისტრობის კანდიდატი. მისი თქმით, ამ გუნდებს დაფინანსება მხოლოდ კერძო ბიზნესიდან უნდა ჰქონდეთ და ძველი წესით მათი დაფინანსება უნდა გაუქმდეს.
"სად და როგორ უნდა მოხდეს ამ გუნდების გადაყვანა-გადმოყვანა და დაფინანსება, ამაზე მე პასუხს ვერ გაგცემთ, ეს არ არის ჩემი კომპეტენცია. მე მხოლოდ შემიძლია გითხრათ, რომ თუ თავდაცვის უწყებაში ფინანსები დაიხარჯება არამიზნობრივად და ამ შემთხვევაში მიმაჩნია, რომ პროფესიონალური (და არა სამოყვარულო) გუნდების შენახვა და დაფინანსება არის არამიზნობრივი, ამ შემთხვევაში, რა თქმა უნდა, პასუხი უნდა მოეთხოვოს შესაბამის უწყებას. შესაბამის ბიუჯეტში არ იყო განსაზღვრული შესაბამისი თანხა. თავისთავად ცხადია, დაისმის კითხვა - საიდან ხდებოდა, რომელი მუხლებით ხდებოდა ამისი დაფინანსება? ეს საკითხი ალბათ შემდგომში უნდა იყოს სამართალდამცველების განხილვის საგანი. პოლიტიკურ დონეზე შემიძლია გითხრათ - ეს დაუშვებელია. თითოეული თეთრი უნდა მოხმარდეს ქვეყნის თავდაცვისუნარიანობის გაძლიერებას," - განაცხადა ირაკლი სესიაშვილმა.
"რა თქმა უნდა, ეს არ არის საერთო კოალიციის გადაწყვეტილება. ბატონი ირაკლი გამოდიოდა თავისი პირადი შეხედულებიდან და ეს შეხედულება მართებულია იმ მიმართულებით, რომ, რა თქმა უნდა, სწორი არ არის, რომ უწყებრივი გუნდები არსებობდნენ. ჩვენი კონცეფციის მიხედვით, საერთოდ, ქვეყანაში არასაუწყებო კლუბები უნდა არსებობდნენ. მაგრამ ამისთვის შესაბამისი სამუშაოებია ჩასატარებელი. ამიტომ ხელოვნურად ამის შეწყვეტა არის საზიანო. ამიტომ შუა სეზონში ამის გაწყვეტა არ არის მიზანშეწონილი," - განაცხადა ლევან ყიფიანმა.
ამ საკითხზე კომენტარი უკვე გააკეთეს საკალათბურთო გუნდების წარმომადგენლებმა. მათი თქმით, ამ გადაწყვეტილების გამო, შესაძლოა საერთაშორისო სპორტული სამყაროსგან ქართულ გუნდებს გარკვეული სანქციები დაუწესდეს და ასევე შესაძლებელია ამ გადაწყვეტილებით ქართულმა გუნდებმა არსებობს საერთოდ შეწყვიტონ.
"როგორც საქართველოში, ასევე საზღვარგარეთ ჩვენ გაგვაქვს, როგორც საქართველოს, ასევე ქართული არმიის სახელი. ვცდილობთ, რომ ღირსეულად გავაკეთოთ ყველაფერი. მე მაინც დაუჯერებლად მიმაჩნია ეს ფაქტი და დიდი იმედი მაქვს, რომ ასე არ მოხდება. საქართველოსთვის ძალიან მნიშვნელოვანია, რომ საქართველოში ჩემპიონატი იყოს ძლიერი. მარტო არა "არმია", არამედ სხვა რამდენიმე კლუბიც არის, რომლებიც აქამდე სახელმწიფოდან ფინანსდებოდა. სანქციები ამას, რა თქმა უნდა მოჰყვება. როგორც კლუბის მიმართ, ასევე მთლიანად, საქართველოს კალათბურთის ეროვნული ფედერაციის მიმართ. მე არ მინდა და თავს შევიკავებ ნაადრევი დასკვნებიდან," - განაცხადა "არმიის" მთავარმა მწვრთნელმა კოტე ტუღუშმა.
ამ დრომდე, თავდაცვისა და შს სამინისტროების ბალანსზე იმყოფებიან გუნდები - "არმია", "აკადემია" და "ოლიმპი". ასევე არის საფეხბურთო გუნდი "გორის დილა" და სარაგბო გუნდი "არმია".
|
