ივანიშვილი შტეფან ფულეს შეხვდა
18.10.12 20:17
ბიძინა ივანიშვილი დღესვე ბიზნეს-ცენტრში თბილისში მყოფ შტეფან ფულესა და ჰელგა შმიდს შეხვდა. მანამდე კი ევროკავშირის გაფართოებისა და ევროპის სამეზობლო პოლიტიკის საკითხებში ევროკომისარი და ევროპის საგარეო სამსახურის გენერალური მდივნის მოადგილე "ქართული ოცნების" ოფისში იმყოფებოდნენ. ისინი მაია ფანჯიკიძეს და ირაკლი ალასანიას ესაუბრნენ.
საქართველოში ჩატარებულ არჩევნებზე და საქართველო-ევროკავშირის ურთიერთობაზე შტეფან ფულემ პრესკონფერენიაზეც ისაუბრა.
"ძალიან მოხარული ვარ, რომ ამჟამად ვიმყოფები საქართველოში არჩევნებიდან რამდენიმე დღეში და მას შემდეგ, რაც ევროკავშირის საგარეო საქმეთა მინისტრებმა განიხილეს საქართველოში ძალაუფლების მშვიდობიანად გადაცემის საკითხი, რომელიც დაფუძნებული იყო ამომრჩევლის, დემოკრატიული არჩევნების გზით გამოხატული ნების საფუძველზე, მას შემდეგ, რაც მინისტრებმა გამოხატეს მზადყოფნა, რომ მხარი დაეჭირათ საქართველოსთვის, რათა ის კიდევ უფრო დაუახლოვდეს ევროკავშირს. პრეზიდენტმა სააკაშვილმა და ივანიშვილმა დაივიწყეს განსხვავებები, რათა წინ წამოეწიათ საქართველოს მთავარი ინტერესები. მივესალმები მათ საზოგადოებრივ ცნობიერებას და პატრიოტიზმს. ევროკავშირს იმედი აქვს, რომ ისინი გააგრძელებენ ერთობლივად კონსტრუქციულ მუშაობას. ჩვენ გვინდა საჯაროდ მადლობა გადავუხადოთ ევროკავშირის სახელით პრეზიდენტ სააკაშვილსა და მის ხელისუფლებას მიღწევებისთვის რეფორმების მიმართულებით, რომლითაც ნამდვილად შეუძლიათ იამაყონ. ასევე შეუძლიათ იამაყონ იმით, თუ როგორ მოხდა ხელისუფლების გადაცემა. ჩვენ ვაგრძელებთ მოქმედებას წინასწარ დადგენილი პოლიტიკური კალენდრის შესაბამისად. ხვალ ჩატარდება ბრიუსელში მნიშვნელოვანი კომიტეტის სხდომა პარტნიორობის საკითხებზე. მომვალ კვირას დაგეგმილია მორიგი პლენარული სხდომა ასოცირების ხელშეკრულების საკითხებზე. ჩვენ არ ვაპირებთ გადავდოთ ღრმა და ყოვლისმომცველი თავისუფალი ვაჭრობის შესახებ მოლაპარაკებები. ჩვენ ხაზი გავუსვით, რომ გვსურს შენარჩუნდეს უწყვეტობა და მდგრადობა ამ მნიშვნელოვანი დოკუმენტის მიმართულებით.
|
