აშშ-ის ელჩი ბათუმში შეხვედრებს მართავს
19.10.12 15:34
შეერთებული შტატების ელჩი ბათუმში შეხვედრებს მართავს. რიჩარდ ნორლანდი აჭარის მთავრობის თავმჯდომარეს შეხვდა, მანამდე კი ის ბათუმის მერს ესაუბრა. გაცნობითი სახის შეხვედრა დახურულ კარს მიღმა შედგა. რიჩარდ ნორლანდის განცხადებით, ყურადღება გამახვილდა ქვეყანაში მიმდინარე პროცესებსა და ბათუმის სამომავლო პროექტებზე. ელჩი ტურისტული ინფრასტრუქტურის განსავითარებლად და საწარმოების ასამოქმედებლად ქალაქის მერს თანადგომას დაჰპირდა.
`ის, რასაც ბათუმში ვხედავთ, ერთგვარად ასახავს საქართველოში მიმდინარე პროცესებს. ეს არის ის ვითარება, როდესაც ორივე პოლიტიკურმა მხარემ უნდა ითანამშრომლოს. ჩვენ ვხედავთ, რომ ორივე მხარე გამოხატავს მზადყოფნას - ითანამშრომლოს ქართველი ხალხის ინტერესების დასაცავად. ბათუმში ვხედავთ აშკარა ინტერესს იმ საინვესტიციო პროექტების შესანარჩუნებლად, რომელიც ხელს შეუწყობს ბათუმს და მთლიანად ამ რეგიონს ეკონომიკური განვითარებისა და წინსვლისთვის. ქალაქის მერი განწყობილია ითანამშრომლოს ყველა სტრუქტურასთან, როგორც ბათუმში, ასევე თბილისში ცენტრალური ხელისუფლების წარმომადგენლებთან, რათა მიიღონ საჭირო რესურსები შემდგომი წინსვლისთვის,`- განაცხადა ელჩმა.
|
