ახალმა პარლამენტმა პირველი სხდომა გამართა
21.10.12 17:53
2012 წლის მერვე მოწვევის პარლამენტის პირველ სხდომაზე უკვე კომიტეტების თავმჯდომარეები და შემადგენლობაც დაამტკიცეს. არჩეულია პარლამენტის თავმჯდომარე და ვიცე-სპიკერები.
მერვე მოწვევის პირველი სხდომა დღეს საქართველოს პრეზიდენტმა გახსნა, დავით უსუფაშვილის სპიკერად დამტკიცებამდე კი საპროცედურო საკითხებს საპატიო თავმჯდომარის სტატუსით ერთ-ერთი უხუცესი დეპუტატი - ივანე კიღურაძე უძღვებოდა.
” ყოველი თქვენგანი, თითოეული ფრაქცის წარმომადგენელი ორივე პარტიიდან ქართველი ერის ლეგიტიმური წარმომადგენელია - ერის, რომელიც ჩვენ ძალიან გვიყვარს და ვემსახურებით. - განაცხადა მიხეილ სააკაშვილმა.
”გაჩნდა ახალი უმრავლესობა. დღეს ახალი პარლამენტის სხდომა იმართება, ხვალ ახალი პრემიერ-მინისტრი გვეყოლება, იქმნება ახალი მთავრობა და ახალი ოპოზიციის კონსოლიდირებაც მოხდა.
ჩვენი ქვეყნის ისტორიაში ეს იყო პირველი დემოკრატიული პროცესი, რომლის დროსაც ხალხს არჩევანის ალტერნატივა ჰქონდა.
როგორც იქნა, ქართველმა ხალხმა შექმნა სისტემა, რომელშიც მთავრობა იცვლება არა ტყვიებით, ტანკებით, დრამატული რევოლუციებით, ან თუნდაც, ვარდებით, არამედ უბრალოდ ბიულეტენებითა და ნორმალური არჩევნებით.” - განაცხადა პრეზიდენტმა.
პარლამენტის შენობის დატოვების წინ პრემიერ-მინისტრობის კანდიდატმა ჟურნალისტებისთვის მორიგი კომენტარი გააკეთა. ბიძინა ივანიშვილმა კიდევ ერთხელ აღნიშნა, რომ უმრავლესობა უმცირეობასთან მიმართებით თანამიმდევრული და და კონსტრუქციული იქნება. აქვე პრემიერობის კანდიდატმა პარლამენტის ახალი შენობის არაკომფორტულობაზეც ილაპარაკა და კვლავ დაადასტურა, რომ პარლმენტის თბილისში დასაბრუნებლად მსჯელობა ინტენსიურად მიმდინარეობს.
2012 წლის მერვე მოწვევის პარლამენტის შემადგენლობის მიერ ფიცის დადების შემდეგ ახალი საკანონმდებლო ორგანოს სხდომათა დარბაზში საქართველოს ჰიმნი აჟღერდა.
პირველი სხდომის საპატიო სპიკერმა ჰიმნის დასრულების შემდეგ დროებითი ხმის დამთვლელი კომისიის თავმჯდომარედ ბიძინა გუჯაბიძე, ხოლო მდივნად კი თამაზ ავდალიანი დაასახელა. რის შემდეგაც უკვე ტრიბუნა დროებითი სამანდატო კომისიის ხელმძღვანელს დაუთმო.
ივანე კიღურაძემ პარლამენტის სხდომაზე 30-წუთიანი შესვენება კიდევ ერთხელ გამოაცხადა, რომ საპარლამენტო უმრავლესობასა და უმცირესობას ფრაქციების რეგისტრაციებისთვის განაცხადები წარედგინათ. მერვე მოწვევის პარლამენტში"ქართული ოცნების" სამი და "ნაციონალური მოძრაობის" სამი ფრაქცია იქნება.
კენჭისყრაზე უკვე საკანონმდებლო ორგანოს ხელმძღვანელის ერთადერთი კანდიდატურა დადგა.
რეგლამენტით გამოიყო დრო პარლამენტის წევრებისთვისაც რომლებსაც მომავალ თავმჯდომარესთან კითხვები ჰქონდათ. პირველი, ვინც სიტყვით გამოვიდა, პარლამენტის ყოფილი თავმჯდომარე და უმცირესობის ლიდერი დავით ბაქარძე იყო.
ბაქრაძის შემდეგ, დეპუტატებს უმრავლესობის ლიდერმა და სხვა წევრებმა მიმართეს.
კენჭისყრის დასრულების შემდეგ დღვანდელი სხდომის საპატიო სპიკერმა ივანე კიღურაძემ ადგილი ახალარჩეულ პარლამენტის თავმჯდომარეს დავით უსუფაშვილს დაუთმო. პარლამენტმა პირველი კენჭისყრებით ვიცე-სპიკერები დაამტკიცა. პარლამენტის თავმჯდომარის პირველი მოადილე მანანა კობახიძე იქნება. ვიცე-სპიკერებად პარლამენტმა ზვიად ძიძიგური და ზურა აბაშიძე დაამტკიცა. ვიცე-სპიკერის თანამდებობაზე თავისი სურვილით ზურაბ ტყემალაძემ თქვა უარი.
საქართველოს პარლამენტში კიდევ ორი ვიცე-სპიკერია. აჭარის ავტონომიური რესპუბლიკის კვოტით, ვიცე-სპიკერის თანამდებობაზე მურმან დუმბაძე აირჩიეს. უმცირესობიდან კი პარლმენტმა ვიცე-სპიკერად გიორგი ბარამიძე დაამტკიცა.
|
