დიმიტრი შაშკინმა ფეისბუქზე წერილი გამოაქვეყნა
22.10.12 11:36
თავდაცვის მინისტრის მოვალეობის შემსრულებელმა საქართველო დატოვა. აქამდე ვრცელდებოდა სავარაუდო ინფორმაცია, რომ დიმიტრი შაშკინი შვებულებაში იმყოფებოდა, თუმცა ცოტა ხნის წინ "ფეისბუკის" გვერდზე მან წერილი გამოაქვეყნა, რომელშიც ნათქვამია:
"მე მივიღე გადაწყვეტილება, რომ დავტოვო საქართველო იმ იმედით, რომ დავბრუნდები და კვლავ მექნება საშუალება ვემსახურო ჩემს ქვეყანას, ჩემს ხალხს. არ გამიკვირდება, რომ უახლოეს მომავალში გაიგოთ ბევრი "გაუგონარი ამბავი" ჩემ შესახებ. ვინც მიცნობს, არ დაიჯერებს, თუმცა, ვინც არ მიცნობს, მინდა დავარწმუნო, რომ ყოველთვის ვიცავდი კანონს და პასუხისმგებლობით ვეკიდებოდი ჩემზე დაკისრებულ მოვალეობებს. არ ვნანობ არც ერთ გადაწყვეტილებას, რომელიც ბოლო ოთხი წლის განმავლობაში მივიღე და მზად ვარ ვუპასუხო ნებისმიერ შეკითხვას."
სოციალურ ქსელში გავრცელებულ ვრცელ წერილში დიმიტრი შაშკინი აგრეთვე საუბრობს იმ რეფორმებზე, რომელიც მან სასჯელაღსრულებისა და განათლების მინისტრის რანგში განახორციელა და წამოიწყო, როგორც თავდაცვის მინისტრმა. ის მადლობას უხდის მინისტრთა კაბინეტის სხვა წევრებსა და ადამიანებს, რომლებთან ერთადაც წლების განმავლობაში მუშაობდა.
|
