ივანიშვილი სამოქალაქო საზოგადოების აზრის გაზიარებისთვის მზადაა
22.10.12 15:51
შეეხება თუ არა ცვლილება კიდევ ერთ მინისტრობის კანდიდატს? - ბიძინა ივანიშვილი აცხადებს, რომ მზადაა დავით დარახველიძის ლტოლვილთა და განსახლების მინისტრის პოსტზე წარდგენამდე სამოქალაქო სექტორთან დამატებითი კონსულტაციები გამართოს.
დავით დარახველიძე შევარდნაძის მთავრობაში რაჭა-ლეჩხუმისა და ქვემო სვანეთის გუბერნატორი იყო. 19 ოქტომბერს კი 9 არასამთავრობო ორგანიზაციამ წინასაარჩევნო პერიოდში დარახველიძის რასისტული გამონათქვამების გამო, ბიძინა ივანიშვილს მისი კანდიდატურის მოხსნის ინიციატივით მიმართა.
`სამოქალაქო საზოგადოების გაძლიერება და ჩამოყალიბებაა ჩემი საბოლოო მიზანი. შესაბამისად, მაქსიმალურად გავუწევ ანგარიშს ყოველგვარ კრიტიკას და პოზიციას, რომელიც იქნება სამოქალაქო საზოგადოების მხრიდან, თუ ის საფუძვლიანი იქნება,`- განაცხადა ივანიშვილმა.
პრემიერობის კანდიდატის ამ შეფასებას დადებითი გამოხმაურება მოჰყვა არასამთავრობო ორგანიზაციების მხრიდან. მათთვის ასეთი კონსტრუქციული მიდგომა საზოგადოებრივი აზრის მიმართ მისაღებია.
|
