ბიძინა ივანიშვილმა უმცირესობის შეკითხვებს უპასუხა
24.10.12 14:00
პრემიერ-მინისტრობის კანდიდატი ბიძინა ივანიშვილი დღეს ქუთაისში, პარლამენტში მივიდა და უმცირესობის შეკითხვებს უპასუხა. კითხვები ძირითადად `ქართული ოცნების` წინასაარჩევნო პროგრამაში ასახულ დაპირებებს, მათი შესრულების გზებსა და ვადებს ეხებოდა.
სხდომას უმცირესობის ლიდერი დავით ბაქრაძე უძღვებოდა. შეხვედრა კითხვა-პასუხის რეჟიმში მიმდინარეობდა.
შეკითხვები შეეხო უნივერსალურ დაზღვევას, სამედიცინო სექტორის გაუმჯობესებას, პენსიების ზრდას, სოფლის მეურნეობის მილიარდდოლარიანი პროგრამის განხორციელებას, საბანკო კრედიტებზე პროცენტების დაწევას, ტარიფების შემცირებას, დევნილთა საცხოვრებელი პირობების გაუმჯობესებას.
ბიძინა ივანიშვილმა ვერც ერთი პროგრამის განხორციელებაზე ვერ დაასახელა კონკრეტული თარიღი, თუმცა ყველა სფეროში თანხების მობილიზაციის ალტერნატიულ გზებზე ისაუბრა, რომელიც, მისი თქმით, კანონიერი გზით განხორციელდება.
`რაც შეეხება წყაროს, როდესაც ჩვენ სოფლის მეურნეობის მილიარდიან ფონდზე ვსაუბრობდით და არ გვქონდა რეალური წარმოდგენა ბიუჯეტის შემადგენლობაზე, მხედველობაში მქონდა დამატებითი წყაროები ბიუჯეტის გარეთ. ჩვენ შევისწავლით ბიუჯეტის რეალურ შესაძლებლობებს და რაც არ იქნება შესაძლებელი, რომ დაფინანსდეს ბიუჯეტიდან, იმ პროექტებს კანონიერი გზით დავაფინანსებთ,`- განაცხადა ივანიშვილმა.
შეკითხვები ბიძინა ივანიშვილის მიერ წინასაარჩევნოდ გაკეთებულ განცხადებებსაც შეეხო, როგორიცაა მაგალითად, მშვიდობის ხიდის დანგრევა ძველ თბილისში. ბიძინა ივანიშვილმა განაცხადა, რომ ერთპიროვნული გადაწყვეტილებები მიღებული არ იქნება და მსგავსი ნაბიჯები საზოგადოებრივი გამოკითხვის შემდეგ იქნება მიღებული.
რაც შეეხება საბანკო კრედიტებზე პროცენტების დაწევას, ივანიშვილმა განაცხადა, რომ ეს ხელოვნურად ვერ მოხერხდება და ეს პროცესი ბაზარმა და ეკონომიკამ უნდა განსაზღვროს.
`თუმცა ის პირობები, რომლის დაფუძნებასაც ჩვენ ვაპირებთ ეკონომიკაში და ინვესტიციების შემოდინებამ შესაძლებელია გავლენა მოახდინოს პროცენტების დაწევაზე,`- განმარტა ივანიშვილმა.
პრემიერ-მინისტრობის კანდიდატი ტერიტორიული მთლიანობის პრობლემასაც შეეხო და განაცხადა, რომ `სწორი ქმედებებით, სწორი ქცევითა და დიპლომატიური ურთიერთობებით ტერიტორიული მთლიანობა აღდგება, თუმცა ამის გასაღებიც ისევ ქვეყნის შიგნით არსებობს.`
ბიძინა ივანიშვილს შეკითხვა პოლიტიკიდან წასვლის შესახებ მისი დაპირების თაობაზეც დაუსვეს. პრემიერ-მინისტრობის კანდიდატმა განაცხადა, რომ მან პოლიტიკა შესაძლოა წელიწადნახევარში დატოვოს.
`თუმცა მე საქართველოდან არ წავალ. დავტოვებ ისეთ გუნდს, რომელიც ჩვენს ყველა დაპირებას შეასრულებს. ამ დაპირებებზე მე პასუხისმგებლობას არ ვიხსნი. ვაპირებ სამოქალაქო სექტორის ერთ-ერთ აქტიურ წევრად დარჩენას და სამოქალაქო საზოგადოებასთან ერთად ვაკონტროლებ ჩემ მიერ დატოვებულ ხელისუფლებას, რადგან ჩვენი დიდი პრობლემაა სამოქალაქო საზოგადოების გამოუცდელობა, როგორ აირჩიოს და შემდეგ აკონტროლოს ხელისუფლება. ჩვენ არ უნდა ვიყოთ მუდმივად კარგი პრეზიდენტის და პრემიერ-მინისტრის მოლოდინში. უნდა ვისწავლოთ, როგორ ავირჩიოთ და როგორ ვაკონტროლოთ, რათა მივიღოთ ევროპული ტიპის საზოგადოება. ეს შესაძლებლად მიმაჩნია ორ ათეულ წელიწადში,`- განაცხადა ივანიშვილმა.
|
