ტელეკომპანია `პიკის` თანამშრომლების აქცია პარლამენტთან
25.10.12 11:49
პარლამენტის სხდომის დაწყებამდე საკანონმდებლო ორგანოს შენობასთან ტელეკომპანია `პირველი კავკასიურის` თანამშრომლები მივიდნენ და მათი არხის გათიშვა გააპროტესტეს. აქციას მათ საინფორმაციო გამოშვების სახე მისცეს და ღია ცის ქვეშ იმიტირებული სტუდია მოაწყვეს. "პიკის" თანამშრომლებს შეკითხვები აქვთ საზოგადოებრივი მაუწყებლის გენერალურ დირექტორთან და ტელეკომპანიის მენეჯმენტთან - რატომ გაითიშა მათი არხი და როგორ დაიხარჯა "პირველი კავკასიურისთვის" გამოყოფილი თანხები. თავიანთი თხოვნა მათ პარლამენტში მისულ პრემიერ–მინისტრობის კანდიდატსაც გადასცეს. ბიძინა ივანიშვილმა განაცხადა, რომ ის ამ საკითხით დაინტერესდება.
`პირველი კავკასიურის` თანამშრომლების ნაწილი კი თბილისში, საზოგადოებრივი მაუწყებლის შენობასთან არის შეკრებილი. ისინი სამეურვეო საბჭოს გადაწყვეტილებას ელოდებიან. სხდომა ამ წუთებში დახურულ კარს მიღმა მიმდინარეობს და ტელევიზიასთან შეკრებილთა ვარაუდით, საბჭოს წევრები სწორედ `პიკის` საკითხს განიხილავენ.
`პირველი კავკასიურის`მაუწყებლობა 20 ოქტომბერს საზოგადოებრივი მაუწყებლის გენერალური დირექტორის განცხადების საფუძველზე შეწყდა. გიორგი ჭანტურიას თქმით, ტელეკომპანიამ ხელშეკრულების პირობები უხეშად დაარღვია.
|
