განათლების სამინისტრომ გამოცდების ახალი მოდელი შეიმუშავა
29.10.12 12:33
განათლების სამინისტრომ მე-11-მე-12 კლასის მოსწავლეებისთვის ახალი საგამოცდო მოდელი შეიმუშავა, რომლის მიხედვით, მე-11 კლასის მოსწავლეები სასწავლო წლის ბოლოს ფიზიკის, ქიმიის, ბიოლოგიისა და გეოგრაფიის გამოცდას ჩააბარებენ, მე-12 კლასში კი მათ ქართული ენისა და ლიტერატურის, უცხო ენის, მათემატიკისა და ისტორიის გამოცდის ჩაბარება მოუწევთ.
ამასთან, მე-11 კლასის მოსწავლე, ამა თუ იმ საგანში წარუმატებლობის მიუხედავად, შეუფერხებლად აგრძელებს სწავლას მომდევნო კლასში და აღნიშნულ საგანში გამოცდას დამატებით აბარებს სასწავლო წლის ბოლოს.
ახალი მოდელის სპეციფიკიდან გამომდინარე, სასკოლო და მისაღები გამოცდები სკოლებში ჩატარდება.
მოსწავლეები, რომლებიც 2012-2013 სასწავლო წელს მეთერთმეტე კლასში სწავლობენ, გამოცდებს, გამონაკლისის სახით, არა მაისში, არამედ მომდევნო სასწავლო წლის ოქტომბერში ჩააბარებენ. შესაბამისად, მათ ოპტიმალური დრო ექნებათ გამოცდებისათვის მოსამზადებლად.
უმაღლეს სასწავლებლებში სწავლის გაგრძელების მიზნით, აბიტურიენტები ერთიან ეროვნულ გამოცდებს, ტრადიციულად, ივლისის თვეში ჩააბარებენ.
|
