ირაკლი ალასანიამ სამი მოადგილე დაასახელა
31.10.12 14:18
თავდაცვის მინისტრის მოადგილეების ვინაობა ცნობილია - ირაკლი ალასანიამ ამ თანამდებობებზე დღეს ლევან დოლიძე, ირაკლი გეგეჭკორი და ალექსანდრე ბურჭულაძე დაასახელა. ირაკლი ალასანიას გადაწყვეტილება მეოთხე მოადგილესთან დაკავშირებით ჯერჯერობით უცნობია.
ლევან დოლიძე რეფორმებს უხელმძღვანელებს უწყებაში; მასვე დაევალება საგარეო კუთხით მუშაობა. ირაკლი გეგეჭკორი უსაფრთხოების საკითხებს გაუწევს კურატორობას. ალექსანდრე ბურჭულაძე კი სამინისტროს ფინანსურ მოდერნიზაციას გააკონტროლებს.
ბურჭულაძემ უკვე დაადასტურა, რომ უწყების ბიუჯეტიდან არამიზნობრივადაა დახარჯული 113 მილიონი ლარი. დღეს მინისტრმა მედიასთან საუბრისას კიდევ ერთხელ დაადასტურა, რომ მისი ხელმძღვანელობის პერიოდში სამინისტროს მუშაობა საზოგადოებისათვის ღია და გამჭვირვალე იქნება.
მომავალ კვირას გაირკვევა, ვის დაასახელებს ირაკლი ალასანია თავდაცვის სამინისტროს გაერთიანებული შტაბის ხელმძღვანელად.
|
