პირველი სამუშაო შეხვედრა პრემიერ-მინისტრთან
29.10.12 14:33
საქართველოს პრემიერ-მინისტრმა ბიძინა ივანიშვილმა მთავრობის წევრებთან პირველი სამუშაო შეხვედრა გამართა. დილიდან მთავრობის კანცელარიაში იყოფებოდნენ საგარეო საქმეთა მინისტრი მაია ფანჯიკიძე, თავდაცვის მინისტრი ირაკლი ალასანია და სოფლის მეურნეობის მინისტრი დავით კირვალიძე.
მაია ფანჯიკიძის განცხადებით, შეხვედრაზე საუბარი იყო სხვადასხვა საორგანიზაციო საკითხზე, მათ შორის პრემიერის უცხოეთში ვიზიტების თაობაზე.
თავდაცვის მინისტრის ირაკლი ალასანიას თქმით კი მან პრემიერი საქმის კურსში ჩააყენა იმასთან დაკავშირებით, თუ რა ვითარებაა თავდაცვის სისტემაში.
`ეს იყო ჩვენი პირველი სამუშაო შეხვედრა. პრემიერ-მინისტრი საქმის კურსში ჩავაყენე სისტემაში შექმნილ ვითარებაზე, მათ შორის ფინანსური კუთხით არსებული მდგომარეობის შესახებ და იმასთან დაკავშირებით, თუ რამდენად არის ჯარი საბრძოლო მზადყოფნაში,`- განაცხადა ალასანიამ.
დავით კირვალიძის განცხადებით კი შეხვედრაზე ყურადღება გამახვილა სოფლის მეურნეობის მილიარდიანი ფონდის შექმნის საკითხებზე.
`ამ ფონდის მიზანი დამატებითი ინვესტიციების მოზიდვა - უცხოური კაპიტალის შემოტანა იქნება, თუმცა ამასთან იარსებებს ბიუჯეტი, რომელიც თავის საქმეს გააკეთებს და ბუნებრივია, ეს ფონდი მასთან თავსებადობაში მოვა,`- განაცხადა მინისტრმა.
დღესვე კანცელარიაში იმყოფებოდა აშშ-ის ელჩი საქართველოში რიჩარდ ნორლანდი, რომელმაც პრემიერ-მინისტრს პრეზიდენტ ობამას მილოცვის წერილი გადასცა.
როგორც ბიძინა ივანიშვილთან შეხვედრის შემდეგ რიჩარდ ნორლანდმა ჟურნალისტებს განუცხადა, მისთვის დიდი პატივია გადასცეს პრემიერ-მინისტრს მილოცვის წერილი, ასევე უსურვოს მას წარმატება პრემიერ-მინისტრის რანგში.
ელჩმა ასევე იმედი გამოთქვა, რომ საქართველო-აშშ-ის სტრატეგიული პარტნიორობა გაგრძელდება და აშშ გააგრძელებს საქართველოს ევრო-ატლანტიკური მისწრაფებების მხარდაჭერას.
|
