გიორგი კალანდაძემ თანამდებობა დატოვა
02.11.12 11:00
არაოფიციალური ინფორმაციით, საქართველოს გაერთიანებული შტაბის ხელმძღვანელმა თანამდებობის დატოვების შესახებ განცხადება დაწერა, თუმცა ის პრეზიდენტის მხრიდან ჯერ დაკმაყოფილებული არ არის. გიგი კალანდაძე ამ პოსტზე ერთი თვის წინ საქართველოს პრეზიდენტმა დანიშნა.
კალანდაძე სხვადასხვა დროს გაერთიანებული შტაბის პირველი მოადგილის, სახმელეთო ძალების მოვალეობის შემსრულებლისა და მე-4 ქვეითი ბრიგადის მეთაურის პოსტებს იკავებდა.
დღის მეორე ნახევარში თავდაცვის მინისტრმა ირაკლი ალასანიამ საზოგადოებას გაერთიანებული შტაბის ახალი ხელმძღვანელი უნდა წარუდგინოს. მისი დანიშვნა კი პრეზიდენტის პრეროგატივაა.
უკვე ცნობილია, რომ კალანდაძეს ბრიგადის გენერალი ვახტანგ კაპანაძე შეცვლის. ვახტანგ კაპანაძე აფხაზეთის ომის მონაწილეა, სხვადასხვა დროს კი ის ბრიგადის მეთაური და გენერალური შტაბის უფროსი იყო. ამჟამად საგარეო დაზვერვაში ერთ-ერთ მაღალ თანამდებობაზე მუშაობს. ვახტანგ კაპანაძეს სამხედრო განათლება აშშ-ში აქვს მიღებული. ის ასევე არის საქართველოს სამხედრო საინჟინრო აკადემიის აკადემიკოსი.
|
