ქუთაისში პარლამენტის ახალი შენობა გაიხსნა
26.05.12 20:34
საქართველოს ახალი საპარლამენტო დედაქალაქი აქვს - საკანონმდებლო ორგანოს ახალ შენობაში დღეს პირველი საზეიმო სხდომა გაიმართა.
ორი წლის განმავლობაში ნაგებობაზე 2 ათასი მშენებელი მუშაობდა. ბოლო სამუშაო კი სიმბოლურად საქართველოს პრეზიდენტმა შეასრულა. მან პარლამენტის თავმჯდომარესთან ერთად შენობის ფასადზე ბოლო შუშა ჩასვა.
ამ სიმბოლური აქციით პარლამენტის შენობა ქუთაისში საზეიმოდ გაიხსნა. სესიას არა მარტო დეპუტატები, არამედ დიპლომატიური კორპუსის წარმომადგენლები, სასულიერო პირები და სხვა მიწვეული სტუმრებიც ესწრებოდნენ. ქუთისში პირველი რესპუბლიკის დამფუძნებელთა ოჯახის წევრები მიიწვიეს. სხდომას დაესწრო ნოე ჟორდანიას შთამომავალიც.
პარლამენტის ახალ შენობასთან წითელ ხალიჩაზე პირველი თბილისის მერი გამოჩნდა. გიგი უგულავას შემდეგ საკანონმდებლო ორგანოს ახალ შენობაში უმრავლესობის წევრები შევიდნენ.
დეპუტატებმა სასესიო დარბაზში თავიანთი ადგილები მოძებნეს და მაგიდებზე დამონტაჟებული მიკროფონებიც შეამოწმეს.
საზეიმო სხდომას საგანგებოდ ჩაცმული შეუერთდა პაატა დავითაია. 26 მაისის აღსანიშნავად დეპუტატმა თავისი წოდების შეაბამისად, გენერლის მუნდირი მოირგო.
სხდომის დაწყებამდე, დეპუტატებს პარლამენტის თავმჯდომარე მიესალმა. დავით ბაქრაძემ კოლეგებს ახალ შენობასა და ახალ გარემოში მუშაობის გაგრძელება მიულოცა.
პრეზიდენტის მისვლამდე პარლამენტის თავმჯდომარემ რამდენიმე წუთით ტექნიკური შესვენება გამოაცხადა. სწორედ ამ შესვენების დროს შეუერთდნენ კოლეგებს ქრისტიან-დემოკრატები.
პრეზიდენტის მისვლამდე გაიარა წითელი ხალიჩა მისმა ოჯახმაც. მიხეილ სააკაშვილის უმცროსი შვილი, საქართველოს დამოუკიდებლობის დღეს გახსნილ ახალ შენობაში პარლამენტის პირველ სხდომას ქართული ჩოხით დაესწრო.
ახალ შენობაში პარლამენტის პირველი სხდომა საქართველოს ჰიმნით გაიხსნა.
პარლამენტის საზეიმო სხდომის ჩატარება განსხვავებული რეგლამენტით დაიგეგმა. დღეს სიტყვით მხოლოდ საქართველოს პრეზიდენტი გამოვიდა. 40-წუთიანი მიმართვის შემდეგ, დეპუტატებმაც და მიწვეულმა სტუმრებმაც ისევ წითელი ხალიჩა გაიარეს და აღლუმზე ავტობუსებით გაემართნენ.
|
