`ერთიანი ნაციონალური მოძრაობა` შეხვედრებს მართავს
08.09.12 12:25
დღეს საქართველოს 11 ქალაქში ერთიანი ნაციონალური მოძრაობის ყრილობა იმართება. ზოგიერთ ქალაქში მმართველი გუნდის მხარდამჭერებისა და დელეგატების შეკრება ერთდროულად ჩატარდება.
შეხვედრა ზუგდიდის ცენტრში უკვე მიმდინარეობს. მხარდამჭერები და დელეგატები ქალაქის ცენტრალურ მოედანზე არიან შეკრებილები. ადგილზე საქართველოს პრეზიდენტის გამოსვლას ელოდებიან.
ნაციონალური მოძრაობის დღეს დაგეგმილ შეხვედრებს შორის ერთ-ერთი ყველაზე მასშტაბური შეკრება ბათუმში გაიმართება. აქ დელეგატებისა და მმართველი გუნდის მხარდამჭერები ევროპის მოედანზე არიან შეკრებილები. მოსამზადებელი სამუშაოები ქალაქში ჯერ კიდევ დილით დასრულდა.
ერთიანი ნაციონალური მოძრაობა დღეს ყრილობას საარჩევნო კამპანიის ფარგლებში თბილისსა და საქართველოს კიდევ 10 ქალაქში გამართავს. დედაქალაქში ყრილობა სპორტის სასახლეში, სხვა ქალაქებში კი შეხვედრები ღია ცის ქვეშ გაიმართება, საზოგადოებას საქართველოს პრეზიდენტი, პრემიერ-მინისტრი და საარჩევნო სიის პირველი ნომერი დავით ბაქრაძე მიმართავენ და პროგრამას - "მეტი სარგებელი ხალხს" გააცნობენ.
ზუგდიდის ცენტრალურ მოედანზე სამხარეო ადმინისტრაციის შენობის წინ ყრილობა 11 საათზე დაიწყო; ოზურგეთში, ცენტრალურ მოედანზე შეკრება ამ წუთებში მიმდინარეობს. ბათუმში ღონისძიება პირველ საათზეა დაგეგმილი; ყრილობები ერთდროულად გაიმართება რუსთავსა და მცხეთაში, ასევე ამბროლაურსა და ახალციხეში, რაბათის ციხის ტერიტორიაზე. ყრილობები ტარდება ქუთაისში, გორში, თელავში.
რეგიონებში მმართველი გუნდის მხარდასაჭერად ჩადიან საზოგადოებისათვის ცნობილი ადამიანებიც.
დღის ბოლოს შეკრება თბილისში, სპორტის სასახლეში საღამოს 7 საათზე დაიწყება.
|
