პოლიტიკური დებატები საზოგადოებრივ მაუწყებელზე
10.09.12 11:00
პრემიერ-მინისტრობის კანდიდატებს შორის პირველი წინასაარჩევნო დებატები საზოგადოებრივ მაუწყებელზე გაიმართა. დებატებში მონაწილეობას მხოლოდ კვალიფიციური პოლიტიკური პარტიების მიერ დასახელებული სამი კანდიდატი დათანხმდა. გადაცემაში მონაწილეობაზე უარი განაცხადა ბიძინა ივანიშვილმა.
დებატებისთვის ოთხი კითხვა ქვეყნის მოსახლეობის მიერ დასახელებული ყველაზე აქტუალური თემებისა და მედიასაშუალებებისგან გამოგზავნილი შეკითხვების მიხედვით განისაზღვრა. ქვეყნის უსაფრთხოება, საგარეო პოლიტიკა, ეკონომიკა, ფინანსები, ინფრასტრუქტურა, სოციალური სფერო და ჯანდაცვა - ეს ის თემებია, რომელზეც პრემიერ-მინისტრობის კანდიდატებმა პასუხები პირდაპირ ეთერში გასცეს. გამომსვლელთა რიგითობა და კითხვა-პასუხი გადაცემის დაწყებამდე კენჭისყრით განისაზღვრა.
დებატების შემდეგ პრემიერ-მინისტრობის კანდიდატებმა პრაიმ-ტაიმის პრეს-კლუბში გადაინაცვლეს. ჟურნალისტების კითხვებს ქრისტიან-დემოკრატებისა და ლეიბორისტული პარტიის ლიდერებმა უპასუხეს. მათ დებატები შეაფასეს და საარჩევნო ბლოკ "ბიძინა ივანიშვილი - ქართული ოცნების” პრემიერობის კანდიდატის მიერ მიღებულ გადაწყვეტილებას - არ მიეღო მონაწილეობა დებატებში - ამომრჩევლებისადმი უპატივცემულობა უწოდეს.
მოგვიანებით კომენტარი გააკეთა ბიძინა ივანიშვილმაც. დებატების ფორმატს ის აბსურდულს უწოდებს და კვლავ თავის მოთხოვნებს აყენებს.
|
