ბაგრატის ტაძარში წირვა-ლოცვა აღდგა
16.09.12 17:42
ბაგრატის ტაძარი, სადაც წირვა ორ საუკუნეზე მეტი ხნის განმავლობაში შეწყვეტილი იყო, აღდგენილია. განახლებულ ეკლესიაში დილიდან უამრავი ადამიანია შეკრებილი. მათ შორის არიან პოლიტიკოსები.
ბაგრატის ტაძრის კურთხევის ცერემონიას საქართველოს პრეზინდეტი მეუღლესთან და უმცროს შვილთან ერთად დაესწრო. მნიშვნელოვნად დაზიანებული ტაძარის საფუძვლიანი აღდგენა სამი წლის წინ სწორედ სააკაშვილის ინიციატივით დაიწყო. დღევანდელი დღესასწაულის გამო ბაგრატის ტაძარში სპეციალური საგალობელი შეასრულეს.
ხელისუფლების წევრებთან ერთად, ტაძარში იმყოფებიან ოპოზიციის წარმომადგენლებიც - „ქართული ოცნების“ წევრები ირაკლი ალასანია, გუბაზ სანიკიძე, ზვიად ძიძიგური, დავით უსუფაშვილი, ასევე პარტიების „თავისუფალი საქართველოს“, „ქრისტიან-დემოკრატიული მოძრაობის“, „ლეიბორისტული პარტიის,“ "ეროვნულ-დემოკრატიული პარტიის" წევრები.
საღვთო ლიტურგიის დასრულების შემდეგ, იგალობა სრულიად საქართველოს კათოლიკოს-პატრიარქმაც. საგალობლის დასრულების შემდეგ კი ილია მეორემ ტაძარში შეკრებილი ყველა პოლიტიკურ პარტია პრეზიდენტის სახელით ბანკეტზე მიიწვია.
საქართველოს ერთიანობის იდეის ყველაზე სიმბოლური განსახიერება უწოდა ახლად აღდგენილი ბაგრატის ტაძარს საზეიმო წირვის დასრულების შემდეგ საქართველოს პრეზიდენტმა. მიხეილ სააკაშვილმა გაწეული წვლილისთვის მადლობა პატრიარქს გადაუხადა. ილია მეორემ დღევანდელ ფაქტს უდიდესი სასწაული უწოდა და ბაგრატის ტაძრის კურთხევა აღდგომის დღესასწაულს შეადარა.
ბაგრატის ტაძრის, როგორც ერთიანობის სიმბოლოზე გაამახვილეს ყურადღება სხვადასხვა პოლიტიკური პარტიის წარმომადგენლებმაც, რომლებიც დღეს ქუთაისში შეიკრიბნენ. ტაძრის კურთხევის ცერემონიას ხელისუფლეის წევრებთან ერთად თითქმის ყველა ოპოზიციური პარტიის წარმომადგენელი ესწრებოდა. იქ იმყოფებოდნენ კოალიცია "ქართული ოცნებიდანაც", გამონაკლისი მხოლოდ მათი ლიდერი ბიძინა ივანიშვილი იყო.
ტაძარში შესვლამდე მიხეილ სააკაშვილი ბაგრატის ეზოში შეკრებილ ხალხს მიესალმა. განსაკუთრებული დაბადების დღე ჰქონდა ტაძარში მისულ 6 წლის ბიჭს. მას პირადად პრეზიდენტმა მიულოცა და საჩუქარიც გადასცა.
საღვთო ლიტურგიის დასრულების შემდეგ პატრიარქმა მთავრობის წევრები და პოლიტიკური პარტიები ამჯერად უკვე ფოთში ღვთისმშობლის საკათედრო ტაძრის კურთხევის ცერემონიალზე მიიწვია. საზეიმო წირვა იქ 23 სექტემბერს გაიმართება.
საქართველოს კათოლიკოს-პატრიარქმა 9 სექტემბერს საკვირაო ქადაგებისას მთავრობას, ოპოზიციას და სრულიად საქართველოს მოუწოდა, რომ ამ დღეს ბაგრატის ტაძარში მივიდნენ.
ღვთისმშობლის მიძინების სახელობის ტაძარი მე-10-11 საუკუნეებში ბაგრატ მესამემ ააგო და ის საქართველოს ერთიანობის სიმბოლური გამოხატულება იყო.
მნიშვნელოვნად დაზიანებული ტაძარის საფუძვლიანი აღდგენა სამი წლის წინ საქართველოს პრეზიდენტის ინიციატივით დაიწყო.
|
