პოლიციასა და დემონსტრანტებს შორის შეტაკებები მოსკოვში
07.05.12 13:10
ინტერნეტით მოსკოვში ოპოზიციის აქციის დაშლის ამსახველი ახალი ვიდეომასალა ვრცელდება. კადრებში ბალოტნაიას მოედანთან ახლოს ჩანს სასტიკად ნაცემი მამაკაცი, რომელიც, სავარაუდოდ, გარდაცვლილია. თუმცა ოფიციალურად მსხვერპლის შესახებ ოფიციალური პირები არ საუბრობენ.
უკვე დადასტურებულია, რომ გუშინდელი აქციის დროს მოყვარული ფოტოგრაფი დაიღუპა. ახალგაზრდა მამაკაცი შენობის მეხუთე სართულიდან იმ დროს გადმოვარდა, როდესაც ფოტოკამერით ცდილობდა ბალოტნაიას მოედანთან განვითარებული მოვლენების ფირზე აღბეჭდვას.
უკვე საუბრობენ იმის შესახებ, რომ რუსი სამართალდამცველები, წინა აქციებისგან განსხვავებით, გუშინ განსაკუთრებული სისასტიკით გამოირჩეოდნენ. ნაცემია 47 დემონსტრანტი. პოლიციის განყოფილებებში კი 600-ზე მეტი მომიტინგე მოხვდა.
აქციაზევე დააპატიმრეს ოპოზიციის ლიდერები. მემარცხენე ფრონტის ლიდერს სერგეი უდალცოვს სიტყვით გამოსვლაც არ დააცალეს და პირდაპირ სცენაზე აიყვანეს. მოგვიანებით მისი საავადმყოფოში გადაყვანა გახდა საჭირო, რადგან ჯანმრთელობასთან დაკავშირებით პრობლემები შეექმნა.
აქციაზევე დააპატიმრეს ალექსეი ნავალნი და ბორის ნემცოვი, რომელიც აქციის არასათანადო ორგანიზებაში დაადანაშაულეს და 1000-რუბლიანი ჯარიმის შემდეგ გაათავისუფლეს.
მილიონიანი მარში გუშინ შუადღისას დაიწყო. საპროტესტო მსვლელობის შემდეგ, ვლადიმერ პუტინის მმართველობის მოწინააღმდეგეები ბალოტნაიას მოედანზე შეიკრიბნენ. თუმცა მათ ხიდთან შინაგანი ჯარის ქცედანაყოფები დახვდნენ, რასაც შეტაკება მოჰყვა.
ოპოზიციონერებისგან განსხვავებით, სამართალდამცველებს აქციის ჩატარებაში ხელი არ შეუშლიათ რუსეთის ხელისუფლების მომხრეებისთვის, რომლებმაც პაკლონნაია გორაზე ვლადიმერ პუტინს მხარდაჭერა საზეიმო კონცერტის მოწყობით გამოუცხადეს.
|
