ივანიშვილის პოლიტიკური პარტია `ქართული ოცნება - დემოკრატიული საქართველო`
15.02.12 14:11
`ქართული ოცნება - დემოკრატიული საქართველო`- ასე ერქმევა პოლიტიკურ პარტიას, რომლის საინიციატივო ჯგუფი ბიძინა ივანიშვილმა დღეს წარადგინა. ივანიშვილი აცხადებს, რომ პარტიის თავმჯდომარე და საარჩევნო სიის პირველი ნომერი თავად იქნება, მისი მეუღლე კი პოლიტიკაში მხოლოდ იმ შემთხვევაში ჩაერთვება, თუ ივანიშვილმა საქართველოს მოქალაქეობა ვერ აღიდგინა.
`ქართულ ოცნებაში` გამართულ პრეზენტაციას მომავალი პარტიის სახეებიც ესწრებოდნენ. მათი უმრავლესობა საზოგადეობისთვის სხვადასხვა პოლიტიკური აქტივობით უკვე კარგად ნაცნობია.
მათ შორის, ვინც დღეს ივანიშვილმა წარადგინა, მისი საქველმოქმედო ფონდის თავმჯდომარე ირაკლი ღარიბაშვილი; ივანიშვილის ოჯახის ადვოკატი არჩილ კბილაშვილი და ქართული ოცნების იურიდიული ჯგუფის წევრი, ყოფილი სოციალისტი ზაქარია ქუცნაშვილი არიან. ასევე ბიძინა ივანიშვილის პრესსპიკერი და ირაკლი ალასანიას ცოლის და - მაია ფანჯიკიძე და ივანიშვილის მრჩეველთა საბჭოს წევრი ირაკლი სესიაშვილი.
`ქართულ ოცნებაში` ნოდარ ხადურიც გაწევრიანდა, წარსულში ზურაბ ნოღაიდელის მოადგილე და შემდგომში ნინო ბურჯანაძის პარტიის წევრი.
ივანიშვილთან იქნება გოგა ხაინდრავას ყოფილი მოადგილე გია ვოლსკიც; ასევე შევარდნაძის მთავრობის რამდენიმე სახე: თედო ჯაფარიძე, რომელიც ბოლო პერიოდში `ქართული ოცნების` საზოგადოებრივ ორგანიზაციაში საგარეო ჯგუფს ხელმძღვანელობდა, ივანე კიღურაძე, რომელიც 1995 წლის საპრეზიდენტო არჩევნების დროს ცენტრალური საარჩევნო კომისიის თავმჯდომარე და მოგვიანებით, ქართული აკადემიის წევრი იყო.
სულ ბიძინა ივანიშვილმა დღეს საინიციატივო ჯგუფის 18 წევრი წარადგინა, აქედან სამი - კახა კალაძე, ამერიკაში მყოფი ნუგზარ დავითაშვილი და ბადრი პატარკაციშვილის ყოფილი თანაპარტიელი ლერი ხაბელოვი, დღევანდელ პრეზენტაციას არ ესწრებოდნენ. პატარკაციშვილის ყოფილი თანაგუნდლებიდან "ქართულ ოცნებაში" ბიზნესმენი გოგლა ჟვანიაც გაწევრიანდა.
საინიციატივო ჯგუფში ასევე არიან უფლებადამცველები მანანა კობახიძე და თენგიზ ავდალიანი, და გაზეთ `რეზონანსის` უკვე ყოფილი ჟურნალისტი ელისო ჩაფიძე.
|
