`ქართულ ოცნებაში` გასული კვირა წარმატებულად შეფასდა
20.02.12 13:05
ბიძინა ივანიშვილის პოლიტიკური გაერთიანება `ქართული ოცნების` პრესსპიკერმა ბრიფინგზე გასული კვირა შეაჯამა და განაცხადა, რომ გაერთიანებისთვის ბოლო დღეებმა წარმატებით ჩაიარა.
`ბატონმა ბიძინა ივანიშვილმა წარადგინა თავისი პოლიტიკური პარტიის საინიციატივო ჯგუფი. ეს წარდგენა საკმაოდ ფართოდ გაშუქდა ქართულ მედიაში და მიუხედავად იმისა, რომ იყო მცდელობა უარყოფითად წარმოედგინათ ბატონი ბიძინას მიერ დასახელებული გუნდი, ვფიქრობ, რომ საზოგადოებაში ამ გუნდის დასახელებამ დადებითი რეაქცია გამოიწვია,`- განაცხადა ბრიფინგზე მაია ფანჯიკიძემ.
მაია ფანჯიკიძემ `ქართული ოცნების` სამომავლო გეგმებზეც ისაუბრა. მისი თქმით, ბიძინა ივანიშვილის პარტიის რეგიონული და რაიონული ოფისები ფუნქციონირებას ძალიან მალე დაიწყებს.
`ამის შემდეგ საქართველოს მოქალაქეებს არა მარტო თბილისში, არამედ დედაქალაქის გარეთაც ექნებათ საშუალება, რომ მივიდნენ, გამოხატონ თავიანთი პოზიცია და იაქტიურონ იმ საერთო საქმისთვის, რომელსაც ემსახურება ბიძინა ივანიშვილის პარტიის შექმნა და ძალიან მალე პოლიტიკური კოალიციის გამოცხადება,`- განაცხადა ფანჯიკიძემ.
|
