ბაქრაძე ისრაელის პრემიერ-მინისტრს შეხვდა
14.03.12 20:53
დავით ბაქრაძე ისრაელის პრემიერ-მინისტრს შეხვდა. საქართველოს პარლამენტის თავმჯდომარისა და ბენიამინ ნეთანიაჰუმ ორი ქვეყნის ურთიერთობებში არსებული ყველა მნიშვნელოვანი საკითხი განიხილეს; ისაუბრეს პოლიტიკური და ეკონომიკური მნიშვნელობის საკითხებზე.
დავით ბაქრაძე ისრაელში კნესეთის თავმჯდომარის პირადი მიწვევით იმყოფება.
ბაქრაძეს თელ-ავივში საზეიმო დახვედრა მოუწყვეს და სხდომაზე მიიწვიეს. ისრაელის ქნესეთში საქართველოს ჰიმნი აჟღერდა. სწორედ აქ გააკეთა პარლამენტის თავმჯდომარემ მთავარი პოლიტიკური განცხადებები. დავით ბაქრაძემ ისრაელი - საქართველოს პოლიტიკურ და ეკონომიკური ურთიერთობებზე ისაუბრა.
მნიშვნელოვანი განცხადებები გააკეთა სხდომაზე ქნესეთის თავმჯდომარემაც. საკუთარ გამოსვლაში, მან ახსენა ჯვრის მონასტერი, საქართველო-ისრაელის მრავალსაუკუნოვანი ურთიერთობა და ორი ქვეყნის ხელისუფლებებს შორის არსებული მნიშვნელოვანი პოლიტიკური ურთიერთობა.
"არც ისე შორს აქედან, ხეობაში, რომელიც ჯვრის ხეობის სახელწოდებითაა ცნობილი, ცხოვრობდა ქართველი პოეტი შოთა რუსთაველი და შესაძლოა, სწორედ აქ წერდა თავის ეპიკურ პოემა "ვეფხისტყაოსანს". ძვირფასო სტუმრებო, საქართველოს მიერ დამოუკიდებლობის გამოცხადების შემდეგ, საქართველო-ისრაელის ურთიერთობები შეიცვალა, განსაკუთრებით კი ეს პოზიტიური ცვლილება გაიზარდა საქართველოს ამჟამინდელი პრეზიდენტის, "ვარდების რევოლუციის" ლიდერის მიხეილ სააკაშვილის პრეზიდენტობისას. საქართველოს დღეს ჰყავს დემოკრატიული მთავრობა, აქტიური პარლამენტი და აქვს ღრმა ურთიერთობები ეკონომიკისა და სხვა სფეროებში," - განაცხადა ისრაელის ქნესეთის თავმჯდომარემ რუვენ რივლინმა.
|
