პრეზიდენტი ხულოს ესტუმრა
12.05.12 19:19
წმინდა ანდრია პირველწოდებულის ხსენების დღესთან დაკავშირებით, დღეს საქართველოს პრეზიდენტი ხულოში ხარების სახელობის ტაძარში იმყოფებოდა.
მიხეილ სააკაშვილმა ადგილობრივებს დღესასწაული მიულოცა და წირვას დაესწრო, რომელიც მეუფე სპირიდონმა აღავლინა.
პრეზიდენტის განცხადებით, ტაძრების მშენებლობა აჭარაში ინტენსიურად მიმდინარეობს, ხულოს ცენტრში უახლოეს მომავალში დასრულდება აჭარის მაღალმთიან რეგიონში ყველაზე დიდი ეკლესიის მშენებლობა, რომელიც ანდრია პირველწოდებულის, სვიმონ კანანელის და მატათას სახელობის იქნება.
მიხეილ სააკაშვილმა და მეუფე სპირიდონმა ასევე ისაუბრეს ხიჭაურის სახელმწიფო უნივერსიტეტის შესახებ, რომელიც შუახევში ერთადერთი უმაღლეს სასწავლებელია.
მეუფემ მადლობა გადაუხადა პრეზიდენტს და აღნიშნა, რომ სწორედ მისი და პატრიარქის დახმარებით დაიწყო უნივერსიტეტის მშენებლობა, რაც ხელს შეუწყობს ადგილობრივი ახალგაზრდების განათლების დონის ამაღლებას.
|
