მსოფლიო ლიდერებმა კომუნიკე მიიღეს
27.03.12 13:27
საქართველო ბირთვული უსაფრთხოების მსოფლიო კომუნიკეს შეუერთდა. დოკუმენტს სეულში 53-მა ქვეყანამ მოაწერა ხელი. შორისაა საქართველოც, რომელმაც აქტიური მონაწილეობა მიიღო დოკუმენტის შემუშავებაში. 13-პუნქტიან კომუნიკეში საუბარია იმ დამატებით ღონისძიებებზე, რომლებიც ბირთვული უსაფრთხოების განმტკიცებისთვისაა საჭირო. ამ დოკუმენტის მიღებით სამიტის ოფიციალური ნაწილი დასრულებულია.
`ჩვენ ვაღიარებთ, რომ ბირთვული უსაფრთხოების სამიტი არის უმაღლესი პოლიტიკური დონის მნიშვნელოვანი პროცესი, რომელიც მხარს უჭერს ჩვენს ერთობლივ მოწოდებას ყველა დაუცველი ბირთვული ნივთიერებების უსაფრთხოების უზრუნველყოფისათვის. ამ თვალსაზრისით, ჩვენ მივესალმებით არსებით პროგრესს, რომელიც დამსწრე ქვეყნების პოლიტიკური მონაწილეობით იქნა მიღწეული,`- ნათქვამია კომუნიკეში.
დოკუმენტში უკვე განსაზღვრულია მომდევნო სამიტის თარიღი და ადგილი. ის ჰოლანდიაში 2014 წელს გაიმართება.
|
