ქდმ-ს ინიციატივა პარლამენტში შევიდა
05.04.12 15:19
ქრისტიან-დემოკრატებმა საკონსტიტუციო ცვლილებების პროექტი პარლამენტში განსახილველად შეიტანეს. ცვლილების თანახმად, არჩევნებში მონაწილეობის მიღების უფლება ევროკავშირის მოქალაქეებსაც უნდა მიეცეთ.
ამ თემაზე გიორგი თარგამაძემ ცოტა ხნის წინ ბრიფინგი გამართა.
`ჩვენ ვფიქრობთ, რომ ივანიშვილს და მის ადვოკატებს სრული უფლება აქვთ წმინდა სამართლებრივი გზით გააგრძელონ ბრძოლა მისთვის საქართველოს მოქალაქის სტატუსის მოსაპოვებლად. ჩვენი წინადადება უკავშირდება ივანიშვილისთვის საქართველოს მოქალაქის პოლიტიკური უფლებებით აღჭურვას საიმისოდ, რომ მას ჰქონდეს ყველა შესაძლებლობა - მიიღოს მონაწილეობა მომავალ არჩევნებში,` - განაცხადა ბრიფინგზე გიორგი თარგამაძემ და დასძინა, რომ ქრისტიან-დემოკრატების მიზანია თავიდან იქნეს აცილებული სამოქალაქო დაპირისპირების მიზეზები და საზოგადოების პოლარიზაცია.
ქრისტიან-დემოკრატების ინიციატივას უკვე გაეცნენ საპარლამენტო უმრავლესობაში. გოკა გაბაშვილი აცხადებს, რომ ამ ინიციატივას უმრავლესობა მხარს დაუჭერს, რაც საბოლოოდ დაუსვამს წერტილს სპეკულაციას მოქალაქეობის საკითხთან დაკავშირებით და ივანიშვილს ექნება საშუალება მონაწილება მიიღოს არჩევნებში.
პავლე კუბლაშვილის განცხადებით, ქრისტიან-დემოკრატების ინიციატივის განხილვას პარლამენტი ხვალ დაიწყებს.
|
