საქართველოს დელეგაცია პოლონეთში ბიზნესფორუმს დაესწრო
30.09.11 18:07
ვარშავის ფორუმის პარალელურად, პოლონეთის საკურორტო ქალაქ სოპოტში აღმოსავლეთის პარტნიორობის ბიზნესფორუმი გაიმართა, რომელსაც დაესწრნენ, როგორც ევროკომისიის ეკონომიკური სტრუქტურების ხელმძღვანელები, ისე აღმოსავლეთის პარტნიორობის პროგრამაში მონაწილე ქვეყნების მინისტრები, ბიზნესისა და ექსპერტთა წრეების წარმომადგენლები.
საქართველოს დელეგაციას ხელმძღვანელობდა ეკონომიკისა და მდგრადი განვითარების მინისტრი ვერა ქობალია.
ევროკომისია ახალი ეკონომიკური შინაარსის პროგრამების განვითარებას გეგმავს. ფორუმზე ითქვა, რომ საქართველოს, უკრაინის მსგავსად, დიდი პოტენციალი აქვს ევროინტეგრაციის გზაზე.
ფორუმზე დიდი ინტერესით მოისმინეს ვერა ქობალიას მოხსენება, რომელიც შეეხო ევროკავშირთან თავისუფალი ვაჭრობის შეთანხმების გაფორმების მნიშვნელობას და მის გავლენას საქართველოზე.
ქართველმა მინისტრმა ისაუბრა იმ რეფორმებზე, რომელიც მიმდინარეობს საქართველოში და ხელს უწყობს ბიზნესგარემოს გაუმჯობესებას.
|
