საქართველო რუსეთის საგარეო საქმეთა სამინისტროს განცხადების შესახებ
13.04.12 10:28
საქართველოს დისკრედიტაციის მცდელობად აფასებენ თბილისში რუსეთის საგარეო უწყების განცხადებას. ქართველი პოლიტიკოსებისა და უცხოელი ექსპერტების აზრით, საქართველოს ხელისუფლების მიერ გადადგმულ ნაბიჯებს ოფიციალური რუსეთი პროვოკაციული განცხადებებით პასუხობს. რუსეთის საგარეო უწყება საკუთარ მოქალაქეებს საქართველოში ვიზიტისგან თავის შეკავებას ურჩევს იმ მოიტივით, რომ რუსეთის მოქალაქეებს მეზობელ ქვეყანაში საფრთხე ემუქრებათ.
რუსეთის საგარეო საქმეთა სამინისტროში არ მალავენ, რომ საგანგებო განცხადება, სწორედ საქართველოს პრეზიდენტის მიერ ლარსის გამშვებ პუნქტზე გაკეთებულ განცხადებას უკავშირდება, სადაც იგი რუსეთის მოქალაქეებს საქართველოში ხშირად ჩამოსვლას ურჩევს.
საქართველოს ეროვნული უშიშროების საბჭოს მდივნის მოადგილის ბათუ ქუთელიას განცხადებით, უცხოური კვლევებიც კი ადასტურებს, რომ საქართველო ევროპის ერთ-ერთ ყველაზე უსაფრთხო ქვეყანაა, შესაბამისად რუსეთის ნებისმიერი მოქალაქე საქართველოში თავს იგრძნობს დაცულად.
`სამწუხაროდ ასეთი არაადექვატური რეაქცია იყო რუსეთის მხრიდან. იმის მაგივრად, რომ გაემარტივებინათ ხალხთაშორის ურთიერთობა, მათ აბსოლუტურად დესტრუქციული და პროვოკაციული რეაქცია ჰქონდათ ამ პოზიტიურ ნაბიჯებზე,` განაცხადა ბათუ ქუთელიამ.
|
